كيف تحسن أداء البي سي؟
من المهم على اللاعبين المستخدمين لأجهزة الكمبيوتر (بي سي) الحفاظ على أدائها واستقرارها ولازم يعطي كل جهاز حقه من الأداء فمثلا ماراح تحمل لعبة طاقتها فوق طاقة تجميعتك، أو تحمل برامج ماتحتاجها واللي راح تزيد جهد البي سي حقك، وفي مقالنا هذا نتكلم فيه عن نصائح عشان تحسّن ويزيد أداء البي سي من ناحية السوفتوير والهاردوير.
أولاً: الهاردوير
لازم تعرف استخدامك الشخصي للبي سي، هل انت لاعب؟ أو مصمم؟ لأن كل واحد فيهم له تجميعة تناسب البرامج أو الألعاب اللي راح تحملها عليه لكن مع هذا في حاجات أساسية راح تجمع النوعين الإثنين عشان يكون عندك جهاز بي سي ممتاز.
زيادة السعة:
أو الهاردسك الداخلي مثل مانسميه وهو المخصص في تخزين بيانات جهازك، الأفضل إنه يكون يدعم تقنية SSD الجديدة واللي سرعة قراءة البيانات للجهاز أسرع من تقنية HDD، بالإضافة حاول انك ماتوصل الهاردسك لأقصى حد له أو للمنطقة الحمراء، حاول دائمًا إنك تشتري هاردسك جديد أو تزيد السعة في كمبيوتر عبر حذف الملفات اللي ماتحتاجها.
الرامات:
أو الذاكرة العشوائية هذي من القطع الرئيسية اللي تساعد على زيادة سلاسة شغلك بالبي سي، لازم تتأكد إنك اخترت السعة المناسبة لاستخدامك .. إذا انت لاعب يشتغل على برامج ثقيلة أو يشغل اكثر من لعبة في نفس الوقت وعندك برامج ثانية شغالة بالخلفية فهنا راح تحصل جهازك راح يعلق معك كثير وماراح يستجيب لكثير من الأوامر.
المعالج:
واللي يعتبر هو العقل للبي سي، اللي يخليك تتحكم بأي شيء تسويه بالكمبيوتر فالأفضل إنك تاخذ معالج سرعته وعدد الأنوية فيه مناسب لاستخدامك، لإن حتى المعالجات القوية تكون بسعر غال جدًا وغالبا الاعبين اللي ياخذوه قليل، لكن من الأفضل ترقية المعالج إذا كنت لاعب متطور في أداء البي سي.
كرت الشاشة:
كثير مننا يعرف كرت الشاشة لكن محد يعرف كيف يختار الأنسب لاستخدامه، باختصار كرت الشاشة مسؤول عن عرض الرسوميات في شاشتك، وحتى تساعد على إستقراره وأفضل أداء له، خذ كرت شاشة يدعم التقنيات الجديدة مثل RTX إنعكاس الأشعة ، لكن مو شرط إنك تأخذ أقوى نوع فيها، إلا في حالة كنت مصمم لمجسمات ثلاثية الأبعاد.
الآن بعد ما استعرضنا لكم بشكل سريع عن الهاردوير الخاص بجهازك، الآن راح نساعدك في تحسين جهازك من ناحية السوفتوير، واللي تعتبر هي المهمة لأن بناء عليها مهما كانت عندك قطع هاردوير بس استخدامك للبي سي بشكل خطأ. ماراح توصل لأفضل أداء بالعكس راح تبدأ توسوس في إن ليه عندي كل هذه القطع؟ ومع هذا جهازي سيء.
ثانيًا: السوفتوير:
التحديثات:
حاول دائمًا تحدث تطبيقات البي سي أول بأول وهذا الشيء يشمل تحديث الويندوز أو الماك أو برنامج الفايروسات وخصوصًا التحديثات المرتبطة بالمعالج وكرت الشاشة عن طريق إما برامجهم الخاصة، بالإضافة إنك تحدث الويندوز الخاص فيك لأن ممكن الشركات نزلت خصائص جديدة وتسد ثغرات قديمة. في النهاية مافي تحديث تنزله الشركات من فراغ.
وجود برنامج مكافح للفايروسات:
الإنترنت ماهو آمن والبرامج اللي تتحمل وخصوصا اذا كنت تتعامل مع العاب غير قانونية وتكون ب كراك، هذه لازم تنتبه منها وتحافظ على إنك تأخذ الأصلي عشان ماتضرّ جهازك.
من كل تطبيق .. برنامج واحد:
كثير من مستخدمين البي سي يحمّل أكثر من متصفح، وأكثر من مشغّل مقاطع صوت وصورة وأكثر من برنامج عشان يفتح الصور في جهازه، وبرضوا في إضاءات الجهاز وهذا الشيء يسبب ثقل عليه ، عشان كذا حاول يكون عندك برنامج واحد من كل تطبيق تستخدمه.
وضعية توفير الطاقة:
حاول دائما تخلي البي سي مرتاح عن طريق اعدادات استهلاك الطاقة، واللي تقدر تحط فيها مؤقت للجهاز يكون على وضعية توفير الطاقة بعد فترة من عدم الإستخدام، بهذا الشكل راح تتجنب استهلاك قطع البي سي اللي راح تكون شغالة على طول.
لا تشغل برامج كثير في نفس الوقت:
قبل ماتشغل لعبة تلعبها، تأكد إنك مقفل كل التطبيقات الجانبية اللي ماتحتاجها واللي ممكن تضر استخدام الرامات والمعالج وبالتالي مع الوقت راح تشوف إن كفائتهم صارت مو مثل أول.
قفل التطبيقات اللي تفتح مع فتحك للجهاز:
دائم اذا فتحت جهازك تنتظر وقت عشان يتحمل كل شيء وتبدأ تستعمله، وهذا بسبب ان في برامج قاعدة تشتغل وكثير منها ماله داعي وتقدر تقفلها عن طريق الضغط على Ctrl+Shift+Esc راح يفتح معاك مدير المهام ومن الشريط في الأعلى تروح على Startup أو بدء التشغيل تظهر لك البرامج وتضغط على كل برنامج زر الماوس اليمين وتختار Disable أو تعطيل. هذا الشيء راح يخلي جهازك خفيف عند بدء التشغيل.
حذف الملفات المؤقتة من البي سي:
أضغط زر "إبدأ + R" وراح يظهر مربع صغير بالأسفل اكتب فيه %temp% واضغط موافق، راح يفتح لك مجلد فيه ملفات كثير، حدد عليها كلها باختصار Ctrl+A و احذفها كلها .. لاتخاف هي مجرد ملفات عشوائية حذفها ماراح يضر جهازك.
وهذه أبرز النصائح اللي تخليك تحافظ على أداء البي سي ويكون معك جهاز ترتاح في استخدامه.
مقالات فيها نصائح حلوة تهمك: