لأنك قيمر تحتاج لما تلعب يكون لك مكانك ومساحتك الخاصة، عشان كذا أغلب القيمرز نشوفهم يجهزون السيت أب بأشياء كثيرة.

 

بس ممكن ما تعرفها أو ما تعرف وش تحتاج عشان تسوي السيت أب حقك.

 

أنا بشرح لك هنا باختصار وش تحتاج بكم نقطة.

 

لازم تكون مرتاح

 

أكيد إذا كنت راح تسوي سيت أب معناها إنك راح تطول في اللعب، وهنا الراحة تكون مهمة.

 

عشان كذا اختر كرسي قيمنق مناسب لك بالميزانية اللي تقدر عليها وخيارات كراسي القيمنق كثيرة والوانها مختلفة، لأنك لو ما كنت مرتاح وقت اللعب ما راح تستمتع باللعبة، فالكرسي يعتبر أساس من أساسيات السيت أب.

 

وطاولة القيمنق طبعًا لها أهميتها، فما تقدر تحط أغراضك على الأرض أكيد… فاختيار الطاولة مبني على اختيارك للكرسي، أو العكس.

 

ارتفاع الطاولة من الأرض لازم تحسبه وتقارنه مع الكرسي، فأي انحناء لرقبتك وظهرك لفترات طويلة راح يكون شي مزعج لك على المدى القصير قبل الطويل.

الشاشة والبي سي

 

الشاشة هي أحد العناصر المهمة، فشاشة القيمنق لما تشتريها راح تستمر معاك لفترة، ممكن أكثر من أي بي سي، ومواصفات القيمرز تختلف عن المواصفات العامة للشاشات، مثل سرعة التحديث Refresh Rate تكون 90hz أو أكثر لتجربة لعب أفضل، أو حجم الشاشة لازم تحدده بناءً على مساحة الطاولة اللي اخترتها، بحيث يكون فيه مكان للأغراض والاكسسوارات الثانية، كذلك إذا كنت حاب تاخذ شاشة منحنية تعطيك مجال رؤية أوسع أو راح تاخذ شاشة مسطحة عادية، هذا الشي يرجع لك.

وجودة الشاشة احرص ما تنزل عن 1080p أو Full HD، وخيار 4K ممتاز إذا كنت تقدر.

 

إقرأ أكثر عن الفروق بين شاشات IPS و TN و VA 

 

مداخل الشاشة مهم تحرص عليها، كم جهاز بتستعمل مع الشاشة؟ لازم تعرف أكيد

 إذا أجهزة متعددة بتحتاج مدخلين HDMI أو أكثر، وممكن البي سي يدعم USB-C للعرض، في هذه الحالة تأكد لأن هذا الخيار أفضل.

 

وبالنسبة لبي سي القيمنق ركز على المعالج يكون سريع، وكرت الشاشة يكون قوي 4GB أو أكثر، في الغالب متطلبات الحد الأدنى لتشغيل الألعاب تكون مكتوبة على موقع اللعبة أو الغلاف، فانتبه لها قبل تختار البي سي.

 

وشوف إذا كنت راح تخلي البي سي فوق الطاولة أو تحتها، شخصيًا راح يكون أفضل فوق بحيث إنه ما يوصله الغبار والأوساخ من الأرض.

 

ماوس وكيبورد وسماعة

 

الماوس (أو الفأرة) والكيبورد نفس فكرة الشاشة، مو أي شي يمشي في القيمنق.

 

الفأرة تحتاج تكون سريعة بالحركة, وتقاس سرعتها بـdpi، كل ما كان الرقم أكبر كل ما كان أفضل وإذا كانت تجي بأوزان مدمجة قابلة للتغيير راح تساعدك لما تغير بين الألعاب.

 

ولا تنسى تشتري الماوس باد، أو اللبادة اللي الفأرة تتحرك عليها، فيه منها أنواع وأشكال راح تفرق من لعبة إلى لعبة. فيه نوع أملس يعطيك حركة ناعمة، وفيه نوع أكثر خشونة يعطيك بُطئ لكن يكون أكثر دقة في الحركة.

 

الكيبورد هو شي ثاني إضافي، كيبورد الألعاب يعطيك أفضلية وقت اللعب، احساسك بالأزرار لما تضغطها في كيبورد القيمنق يخليك تحس وتسمع صوت الضغطة، عكس الكيبورد العادي. والإضاءة الخلفية للأزرار تسهل لك تشوف الزر بوضوح أكثر وما تغلط وتضغط الزر اللي جنبه ويقتلك العدو لأنك ما لحقت تعشق السلاح.

 

سماعات القيمنق لها أنواع، حدد احتياجك سلكية أو لاسلكية؟ إذا اخترت لاسلكية تأكد إن البلوتوث فيها هو أحدث نسخة، عشان ما يكون فيه تأخير بالصوت، وسواء اخترت سلكية أو لاسلكية ابحث عن سماعة بصوت محيطي، يعني 5.1 وأفضل تختار 7.1.

الاكسسوارات الإضافية

 

إذا كنت حاب تضيف مود مختلف للسيت اب، جرب تضيف إضاءات RGB ملونة، فيه منها أشكال متنوعة.

 

ولا تنسى تاخذ وصلة USB متعددة المداخل، راح تحتاجها لما تقرر تطور السيت أب إذا كنت راح تضيف كرت صوت أو جهاز تحكم بالبث في حال قررت تسوي في المستقبل.

 

في النهاية

 

هذي هي أشياء أساسية في السيت أب، تحتاج تعرفها عشان تقدر تطور السيت أب في المستقبل، وحاول قد ما تقدر إنك ما تستخسر المبلغ اللي راح تدفعه، لأنه في النهاية ما تبغى شي بسيط يخرب مودك وجو اللعب في وقت أنت تحتاج تغير جوك فيه.

 

والقيمنق هو هواية مثله مثل أي هواية ثانية، تحتاج المعدات المناسبة عشان تستمتع فيها بأفضل شكل ممكن.