عالم السماعات عالم كبير، والسماعة لما تشتريها تقعد معك فترة طويلة قبل ما تحتاج تغيرها

وأكيد لما تبغى تلعب راح تدور على سماعة بمواصفات معينة تناسبك.

 

لكن في الغالب سماعات القيمنق هي اللي في بالك لما تبي تشتري شي خاص بالسيت أب حقك

ومن أهم المواصفات ومهم تركز عليها، هي إن السماعات تكون سلكية أو لاسلكية

 

وش الفروقات اللي لازم تاخذها في عين الاعتبار قبل ما تقرر تختار؟

 

سماعة لاسلكية تحتاج بطارية

أكيد صار لك هذا الموقف… تلعب بلايستيشن وفي وسط الحماس وأنت تتفنن باللعب وبالمركز الأول

وفجأة تطفي اليد عليك وتخرب كل اللي سويته!

 

أول قبل ما تكون يد التحكم بدون سلك ما كنا نواجه هذي المشكلة..

 

وفي السماعات اللاسلكية بتواجه نفس المشكلة، يعني إذا كنت شخص تنسى تشحنها لفترة طويلة، سماعات الوايرلس ما تناسبك

ولازم تختار سماعة بطاريتها تدوم لفترات طويلة، ما ينفع وأنت شاحنها قبل 3 ساعات ويخلص شحنها وأنت بوسط اللعب.

تسوق أفضل سماعات القيمنق هنا

لكن السلك مشكلة بعد

مو معنى إن السماعة السلكية أفضل، بس السلك يعني إنك ما تحتاج تشحنها.

لكن إذا خرب السلك تصير لك مشكلة، وأحيانًا المشكلة ما تنتبه لها مباشرة، لأنه قبل ما يخرب السلك تمامًا راح يعطيك تقطيع في الصوت وأحيانًا تتغير جودة الصوت.

 

وإذا كانت سماعتك من النوع اللي ما تقدر تفصل فيه السلك عن السماعة فراح تضطر تغيرها كلها وتدفع سعر وحدة جديدة.

بس إذا كانت من نوع تقدر تفصل فيه السماعة راح تكون المشكلة حلها أسهل، تقريبًا…

لأن السماعات في أحيان كثيرة تستعمل أسلاك معينة ومصممه لنفس السماعة وممكن ما تحصل البديل المناسب لها

 

تقدر تتحرك بحرية

مشكلة أي سماعة بسلك هي طول السلك، فإذا كان السلك طويل تقدر تتحرك بحرية بدون ما تشد السلك، فاحرص دائمًا لما تختار سماعتك يكون السلك معها طويل، وإذا السلك ما كان طويل تقدر تشتري وصلة تمديد.

لكن مع سلك طويل، يبقى السلك مزعج. يعلق بين الأغراض، ولا ممكن يحرك الماوس ولا ممكن تترك حركة مفاجئة وتخرب السلك. فالسلك هو عيب السماعة كلها

 

أي سماعة لاسلكية مستحيل تواجه هذه المشكلة، (أكيد لأنه ما فيه سلك)

ومشكلة الشحن تقدر تحلها لأن بعض السماعات يجي معها السلك وتقدر تستعملها كسماعة سلكية لما يخلص شحنها

 

التوصيل

معك سماعة سلكية؟ سهله مرة عملية التوصيل ولا يحتاج أشرحها حتى، اشبك السلك وابدأ إلعب

لكن السماعات لاسلكية راح تحتاج توصلها بالبلوتوث، وبعض السماعات أداءها يكون أبطأ ويكون فيه تأخير بين الصورة والصوت

لكن إذا سماعتك فيها أحدث نسخة من البلوتوث، ما راح تواجه هذه المشكلة.

 

مو بس للقيمنق

ميزة حلوة مرة في سماعات الوايرلس، إذا كان شكلها حلو وتصميمها مرتب، تقدر تستعملها وأنت برا البيت واستعمالات كثيرة غير اللعب. مثل سماعة SteelSeries Arctis تصميمها جميل وتقدر تاخذها لأي مكان بدون ما تلفت الأنظار، تقدر تسويها بالسماعات السلكية، لكن السلك راح يكون مزعج بالتنقل.

 

الأسعار

السماعات اللاسلكية دائمًا أسعارها تكون أعلى من السماعات السلكية.

وتقدر تبحث عن نسخ من السماعات السلكية، وراح تلقى لها في كثير من الأحيان نفس السماعة لكنها بلوتوث وتكون أغلى بالسعر وأسهل بكثير تحصل سماعة بسلك بجودة صوت عالية وسعر مناسب، مقارنة بسماعات لاسلكية تقدر تحصل شي منها رخيص لكن جودتها مو بالمستوى المطلوب.

 

السماعة لك وللزمن

لما تشتري سماعة راح تقعد معك لفترات طويلة، فمنطقي جدًا إنك تدفع على سماعة مبلغ جيد لأنك ما راح تشتري ثانية في وقت قريب. واحرص تكون عارف وش تحتاج وتحدد اسلوبك معها، أنت من النوع اللي ينسى يشحنها بين فترة وفترة، ولا أنت شخص يخرب سلك السماعات معه كثير؟

 

لما تعرف احتياجك بشكل جيد، راح تعرف تختار السماعة اللي تناسبك.