ألعاب شهر أغسطس
Share
⇦ Back
شهر أغسطس فيه ألعاب تحير الواحد وتخليه ما يدري وش يلعب ووش يخلي. بنشرح لكم بشكل مختصر أبرز العاب هذا الشهر.
Baldur's Gate 3 أو الجزء الثالث من بوابة بالدور لعبة تقمص أدوار مبنية على لعبة Dungeons and Dragons (دنجنز أند دراقونز). وهي الجزء الثالث من السلسلة.
مطورة من قبل Larian Studios (لاريان ستوديوز) اللي طوروا سلسلة ألعاب Divinity (ديفينيتي).
أحداثها في مكان خيالي اسمه العوالم المنسية أو الـ Forgotten Realms.
والقصة بتكون عن مجموعة ناس انخطفوا من مخلوقات فضائية شريرة اسمهم Mind Flayers (مايند فلايرز). وبعد ما خطفوهم زرعوا في روسهم شيء يسمح لهم يتحكمون فيهم وبعد فترة يبدون يتغيرون.
اللعبة حلاتها انك تقدر تلعبها لحالك أو مع أخوياك. لكن ننصحك تختمها مره واحده على الأقل لحالك عشان تعيش التجربة كاملة بعدين انبسط انت وأخوياك.
وتسمح لك اللعبة انك تختار أحد الشخصيات الأساسية في اللعبة أو انك تصمم شخصيتك وتستكشف عالم واسع ومتنوع.
كانت اللعبة في مرحلة الدخول المبكر من اكتوبر 2020, ونزلت يوم 3 أغسطس 2023 على البي سي وبتنزل على البلايستيشن 5 خلال سنة 2023.
Atlas Fallen (أطلس فولن) لعبة أكشن مطورة من قبل deck 13 اللي صنعوا سلسلة The Surge و Lords of the Fallen.
اللعبة أحداثها تدور في عالم مليان رمل وسكان العالم هذا صار عندهم القدرة انهم يغيرون شكل الرمل ويخلونه على شكل أسلحة أو أدوات.
قصة اللعبة عن مجموعة متمردين في عالم اسمه اتلاس يحاولون إطاحة إله فاسد فرض على الناس أمر جديد وما عجبهم.
بالاضافة للقصة, بتقدر تصيد مخلوقات أسطورية لحالك أو مع خويك.
The Texas Chainsaw Massacre لعبة بمنظور الشخص الثالث مبنية على فلم الرعب اللي اسمه نفس اسم اللعبة اللي نازل من سنة 1974.
وفي اللعبة بتقدر تلعب بأحد أعضاء عائلة Slaughter (سلوتر) اللي هم القتلة أو تلعب بضحاياهم وتحاول تعيش.
اللعبة قريبة لـ Dead By Daylight (ديد باي دايلايت) و Friday the 13th (فرايداي ذا 13) لأنها سرفايفال بنفس الطريقة.
قصة الفلم كانت عبارة عن مجموعة اصدقاء قابلوا عائلة من أكلي لحوم البشر اللي عندهم ولد اسمه ليذر فيس ويعشق المنشار عشق مو طبيعي وساكنين في تيكساس بأمريكا.
الفلم نفسه كان مستوحى من جرائم واقعية صارت, لكن مو على قصة حقيقية.
الفلم يعتبر من أفضل أفلام الرعب وأكثرهم تخويفاً في التاريخ. وتأثيره كان كبير على انتاج وكتابة أفلام الرعب بشكل عام.
وصنعوا له أجزاء كثيرة, والحين هذي اللعبة.
Immortals of Aveum (إمورتالز اوف أفيوم) لعبة بمنظور الشخص الأول لكن بدال المسدسات بتكون ساحر.
اللعبة تحكي قصة جاك اللي انضم الى نخبة النخبة من السحرة المقاتلين عشان ينقذ عالم على وشك انه يتدمر.
ولازم يستكشفون أسرار وماضي أفيوم, ويشوفون اذا فيه أمل ينقذونها.
لعبة أكشن مبنية على مفهوم سلسلة Armored Core اللي فيها أليات تقدر تخصصهم وفيها معارك ديناميكية.
طورها فروم سوفتوير صناع دارك سولز وسيكيرو, ونشرتها Bandai Namco.
تدور أحداث اللعبة على كوكب بعيد اسمه Rubicon 3.
والكوكب هذا فيه مادة غريبة اسمها كورال سببت حدث كارثي أشعل الكوكب والنظام النجمي اللي حوله.
واللاعب حقنا مرتَزَق مستقل تسلل لروبيكون 3 وتورط في صراع بين شركات وأحزاب كلهم يحاولون يتحكمون بالكورال.
Sea of Stars (سي اوف ستارز) لعبة تقمص أدوار نظامها أدوار أو يسمونه Turn Based.
نفس الالعاب الكلاسيكية, تطق بعدين يجي دور اللي ضدك بعدين يجي دورك مره ثانية, وهكذا.
واللعبة تابعة لقصة The Messenger (ذا مسنجر) لعبة نزلت في 2018.
لكن مو لازم تلعب The Messenger لأن أحداث اللعبة هذي بتكون في الماضي.
اللعبة تروي قصة طفلين فاليري وزيل يبون يجمعون قوة الشمس والقمر عشان يسوون سحر الكسوف.
اللي هو السحر الوحيد اللي يقدر يحميهم من الوحوش.
اللعبة تتميز بعناصر حل الألغاز, والاستكشاف, والإبحار, والقتال لأنك تقدر تلعب بـ ست شخصيات مختلفة, وتغير عدتهم وتعويذاتهم ومهاراتهم.
اللعبة مطورة من قبل Sabotage Studio (استوديو سابوتاج) وبتتوفر على البي سي, والبلايستيشن, والاكس بوكس, والنينتندو سويتش.