خطوات مهم تسويها بعد ماتشتري بي سي قيمنق
البي سي تجربة كثير يوصفها بالاحتراف لكن إذا كنت بس تبغى تلعب العاب مب موجودة على الكونسل أو تبغى جرافيكس أقوى من الكونسل فأكيد كل واحد عنده اسبابه ولا تخلي اسبابك توفقك من أنك تجرب البي سي او اللابتوب. بي سي القيمنق واللابتوب ميزتها أنها تسوي كل شيء مو بس للألعاب وهذا سبب ارتفاع اسعارها عن البلايستيشن او الاكس بوكس. مبروك عليك الجهاز الجديد وهذي أهم الخطوات اللي يحتاج تشيكها بعد ماتفتح البي سي أو اللابتوب أول مره.
1- شيّك الجهاز
كأول وأهم نقطة إذا كان متعطل أو ناقص قطع واختبر الجهاز من أي عطل بعد ما تتأكد أنه وصلك كامل عشان إذا كان ناقص أو فيه عطل مصنعي ترجعه مباشرة.
2- الاتصال بالانترنت
الاتصال بالانترنت أول خطوة بيطلبها منك جهازك الجديد عشان يبدأ بالتحديث والخطوات الأساسية للجهاز, لكن لأنه بي سي أو لابتوب ألعاب فأنترنت قوي مطلوب جداً بكل الألعاب وأهمها ألعاب الأونلاين. ممكن تقدر تحمّل الالعاب وتتصل بشكل مباشر لكن التعليق واللاق بيستمر معاك إذا ماكان الانترنت قوي بشكل كافي ويُفضل يكون على الألياف البصرية.
3- حدث الجهاز (نظام التشغيل)
في قائمة ويندوز اكتب بالبحث (إعدادت النظام) بعد ماتختار إعدادات النظام اختار (التحقق من التحديثات) إذا كان فيه تحديث جديد لازم تحدثه سواء في لابتوب أو في بي سي وتتأكد كل فترة من تحديث النظام عشان يحدث نظام كرت الشاشة بعد. يعني تحديث ويندوز مهم ولازم تتابعه وأول شيء تسويه. وبعد كل تحديث بيطلب منك إعادة تشغيل الجهاز عشان يثبت التحديث الجديد. لازم تسويه بعد كل تحديث.
4- حدث البرامج الرئيسية
كل البرامج اللي تستخدمها بشكل متكرر. تقدر تلقاها في قائمة ويندوز > (التطبيقات المُثبته) بعد ماتثبت البرامج اللي تبيها تأكد من تحديثها كلها والتطبيقات اللي جت مع الجهاز عشان كل البرامج والتطبيقات تبدأ تعلق بمجرد ماتكون على نسخ قديمة. فالتحديث ضروري لها كلها.
5- تأكد من البرامج واحذف اللي ماتحتاجه
البرامج اللي جت مع الجهاز وتعرف وش استخدامها وما تحتاجها الافضل انك تحذفها عشان تخفف عليك بالمساحة لأن الألعاب حجمها كبير بس انتبه تحذف شيء ماتدري أيش هو قبل تسأل أو تبحث عشان ماتحذف شيء مهم.
6- البرامج اللي تفتح مع جهازك
لاحظت انك كل ماتفتح جهازك يطلع واحد من برامجك ويفتح مباشرة؟ فيه برامج تجي إعداداتها أول ماتنزلها أنها تفتح تلقائي بعد ماتفتح جهازك وهالشيء عادة يكون مزعج لأنك مو دايم تحتاج هالبرامج أول ماتفتح جهازك وبعض الأحيان يبطئ من عملياتك المستعجلة.
ادخل على قائمة ويندوز واكتب بالبحث (التطبيقات) اضغط عليها ثم اختار آخر اختيار بتطلع لك التطبيقات اللي تفتح تلقائي واختار البرامج اللي ماتبيها تفتح كل مره وتسكر البرامج اللي ماتبيها تفتح كل مره.
6- برامج الحماية وMicrosoft Defender
ويندوز عندهم نظام حماية مثبت على كل أجهزتهم اللي هو Microsoft Defender ويتحدث مع تحديثات النظام مطور وقوي ومايتطلب تشترك ببرامج حماية من الفايروسات زي أول بمبالغ غالية سنوياً لكن انتبه من المواقع المزيفة واللي ملغمة إعلانات وغيره وتأكد من مصدر أي شيء تحمله أنه يكون صح وإذا حملت شيء بالغلط احذفه مباشر. والروابط المشبوهه ابعد عنها سواء في المواقع أو بالايميل أو ديسكورد.
7- نظام حماية الطفل.
إذا كان الجهاز للطفل أو يلعب معاك طفل فيه تأكد من تثبيت انظمة حماية الطفل للجهاز ووللإيميل من ويندوز عشان تتأكد من سلامته اثناء اللعب. في قائمة ويندوز اكتب بالبحث (خيارات العائلة) وابدأ باختيار الخيارات اللي تناسب الطفل اللي عندك.
8- من وين تجيب الألعاب؟
والحين نجي للسؤال المهم, إذا كان أول جهاز لك أكيد عندك هالسؤال. أقدر ألعب كل الألعاب على البي سي. والجواب هو إيه بطريقة أو بأخرى. لكن الطريقة اللي تبعدك عن الفايروسات هي أنك تحمل\تشتري الألعاب من موقعها الرسمي للاستدويو الألعاب أو من المتاجر الرسمية مثل Steam و Windows Store و Origin و Gamer Gate وغيرها.
9- لا تلعب لحالك
كل الألعاب الاونلاين الحين تحتاج شله أو مجموعه لان ببساطة اللعب لحالك طفش! حمّل تطبيق لاعب واستخدم خاصية صديق اللعب اللي تتيح لك تختار اللعبة وتكون فريق على مستواك. لا تفوت الفرصة!
10- إذا كان لابتوب
اللابتوب مايفرق كثير عن البي سي اتبع كل الخطوات اللي انذكرت فوق, وتذكر أن اللابتوب المراوح تكون من تحت فلازم يكون على سطح قاسي (طاولة) ماينفع تحطه على كرسي أو كنبه أو سرير فترة طويلة لأن الهواء مارح يدخل وبيسبب بارتفاع درجة حرارة الجهاز. وأحياناً طاولة مخصصة فيها مراوح تكون أفضل للابتوب إذا كنت تلعب على إعدادات عالية.
بدايتها بتفرق مرره وشخصياً انصحك ماتفقد الأمل وتشبك يد تحكم الكونسل حاول تتعلم على الكيبورد والماوس بأقرب فرصة لأنك بتدمنها الدقة بالماوس ماتتقارن بالانالوق حق يد التحكم. وتذكر أن أي شيء يصعب عليك تقدر تسأل لاعبين البي سي اللي حولك أو تبحث عن شرح باليوتيوب أو قوقل. ومبروك عليك الجهاز الجديد مرة ثانية!