مراجعة رزدنت ايفل 4 ريميك
وأخيراً لعبنا رزدنت ايفل 4 كاملة نزلت قبل أقل من أسبوع وباعت 3 ملايين نسخة في أول 48 ساعة من أطلاقها حوالي 80% كانت على بلايستيشن وهذي المراجعة مني كشخص مهووس باللعبة الأصلية وكنت متخوفه من الريميك إنه مايعطيها حقها أو تكون قصيرة.
لكن الحين بما إنها بين يديننا, لعبتها كاملة على صعوبة الهارد كور ومع المهمات الجانبية 12 من أصل 19 مهمة. اخذت قرابة 19 ساعة مع استكشاف الخريطة والبحث وراء الكنوز والمهمات الجانبية وقراءة الملفات.
القصة (حرق للي مالعب اللعبة الأصلية)
القصة الرئيسية عن مهمة العميل ليون كيندي الشخصية الرئيسية من رزدنت ايفل 2 اللي نجا من راكون سيتي اللي ماكمل سنة وهو شرطي جديد بعد ست سنوات انطلب منه يطلع في مهمة في أوروبا لإنقاذ إبنة الرئيس الأمريكي آشلي قرام ولما وصل للقرية عشان يتأكد من وجودها كل شيء بدأ ينهار.
الناس طلعوا محقونين بفايروس اسمه بلاقا (Las Plagas) وتحولوا لكائنات مثل الزومبي لكن بطريقة عدوانية شديدة وسر هذا الفايروس وراء طائفة دينية بأسم لوس إلومنادوس (Los iluminados) ورئيس الطائفة سادلر. ليون في محاولات لإنقاذ إبنة الرئيس المخطوفة مع إنقطاع اتصاله مع الفريق اللي بيطلعهم من القرية.
ليون قابل لويس سيرا باحث في الفايروس اللي أصاب قريته وآيدا اللي كان يعتقد إنها ماتت في حادثة رزدنت ايفل 2 وكراوسر الرائد اللي كان يدربه فجأة لقاه عدوه. ينتقل ليون وآشلي من القرية البدائية إلى قلعة من القرون الوسطى إلى المعمل في الجزيرة الصغيرة في محاولات للرجوع بالسلام مع التخلص من الفايروس اللي أصابهم.
الريميك والفروقات
القصة كاملة مع كل بوس رئيسي وقصته انتقلت بدقة من الأصل للريميك, مع فروقات بسيطة جداً لتعديل بعض الأمور الفرعية اللي خلت القصة محبوكة بشكل أفضل وأوضح بطريقة تخليها أقرب للواقع وابعد عن الخيال مثل أي فيلم أو مسلسل عن كارثة. يعني فيه أمور تمت بالقصة الأصلية حدثت نفسها في الريميك لكن الفاعل اختلف على سبيل المثال. لكن الريميك نقدر نقول عنه إنه وفي للقصة وعناصر اللعبة الأصلية.
ليش سووا لها ريميك؟
بنجاوب السؤال المطروح من الأغلب, ليش ألعب لعبة خلصتها بس عشان جرافيكس أفضل؟ الفرق بين الريميك والريماستر هو فرق واضح الريماستر هو تعديل على جرافيكس اللعبة الأصلية. الريميك وعلى الأقل اللي شفناها من كابكوم انعاد صنعها بالكامل من الجرافكيس للمحرك القصة مو نسخ لصق لأن الحوارات اختلفت 100% وانعاد تسجيلها والبيئة ترتيبها كامل اختلف, ولأني من محبين اللعبة الأصلية وعندي قرابة ألف ساعة فيها بعض الأماكن مامميزتها بالريميك لأن ترتيبها تغير بشكل كبير خصوصاً نهاية القلعة والجزيرة.
مناطق القوة ومناطق الضعف.
الريميك بصراحة فاجئنا بقوته مو لأننا فقدنا الأمل لكن لأن اللعبة الأصلية مبهرة ومحبوبة والكل متفق على رهابتها من كل النواحي. الريميك تفوق بشكل واضح من ناحية الجرافيكس والسرد القصصي واستخدام التقنية الحديثة من ذكاء صناعي وتقنيات قتال جديدة. مناطق الضعف إن الريميك أقصر شوي من الأصلية وفيه بوس فرعي غير موجود. ومع إن الأغلب أتفق إن الأماكن والأشياء المحذوفة كانت حشو إلا أني شخصياً فقدت بعض الأماكن من اللعبة الأصلية. برضو كون آشلي ماتتبع التعليمات شيء مزعج زي لما تقول لها تبقى باللوكر تطلع بعد دقيقتين من نفسها.
الشخصيات والسناريو (حرق)
الشخصيات اللي نعرفها من اللعبة الأصلية كلها موجودة لكن ظهورهم باللعبة اختلف شوي مثل رئيس الطائفة سادلر باللعبة الأصلية كان كل شوي يطلع لكن الريميك ماشفناه نهائياً إلا بالجزيرة وهذا خيار يناسب انسياب القصة.
آشلي كانت ردود فعلها مبالغ فيها باللعبة الأصلية وأحياناً نحس إننا مانفهم ليش تسوي تصرف معين, لكن بالريميك شخصيتها مفهومه جداً وتحسها حقيقة وقريبة للواقع. ليون كمّل على شخصيته الأصلية ومزحاته وبعض هياطه. لويس وكيف ساعدنا وكيف موتته أثرت فينا أكثر بكثير من الأصلية ولأن كراوسر قتله بالريميك بدل سادلر بالأصلية لأنه مأمور من سادلر.
أول لقاء مع آيدا بالأصلية كان غريب لأن محد تكلم عن أن ليون كان يحسبها ماتت اخر مره شافها وماتكلموا عنه. لكن بالريميك عدلوا هذي المحادثة الغريبة وصارت أفضل بكثير.
بشكل عام الشخصيات والسناريو أكثر شيء تحدث بطريقة رائعة وتطور الشخصية قبل حدث معين ملحوظ جداً بأكثر من موضع, مثل لما لويس كان يتهرب من أنه يرد على سؤال ليون "ليش تساعدنا؟" لكن رد على هذا السؤال قبل مقتله بشوي وهذا اللي خلى موتته أعمق من الأصلي بكثير. باختصار حبكة القصة صارت أفضل حتى الفراغات اللي تسائلنا عنها موجودة في ملفات تقرأها موزعة على الخريطة.
الإعداء والذكاء الاصطناعي
الأعداء أكثر شيء مثير للإعجاب في الريميك أو على الأقل للناس اللي لعبوا هارد كور ويمكن ستاندرد لأن بيكون عندك وقت اطول على ماتقتل كل عدو قدامك مهما كان صغير. مستوى العنف اختلف على مستوى اللعبة وتلاحظون بشكل واضح جداً بالجزيرة أكثر شيء مستوى العنف ارتفع بشكل كبير وتصرفات القاناتو صارت عنيفة والهجمات مابينها وقت يمدي تسترجع فيها نفسك. بعض القاناتو يخدعك بأنه يرمي سكينه عليك عشان تنزل بعدين يرميك فيها لما تثبت. وتعاونهم عليك لما واحد يمسك وواحد يضربك.
على الطرف الثاني الذكاء الأصطناعي لآشلي صار مزعج وما أدري هل هو مقصود عشان تبين بشكل طبيعي ولا لا. عرفنا اننا ماعاد نقدر نعطيها أمر الانتظار مثل اللعبة الاصلية لكن مو هذي المشكلة. المشكلة اللي لما تخليها تلحقك بشكل قريب ماتجي وراك ولما تصوب ممكن تجي قدامك وتغطي عليك. ولما تحاول تقتل بالتخفي تصير تمشي قدامك احياناً. عكس الأصلية اللي لما تصوب اوتوماتيك تجي وراك.
الأسلحة وطريقة القتال.
طريقة القتال قدمت اختلاف يوافق وقتنا الحالي واللي هي الـ Parry أو صد الضربات والانحناء عن الضربات العالية وحتى الستلث أو القتل بالتخفي واللي ماتوقعنا نشوفه بهذي اللعبة لأن الأكشن والأسلحة القوية تغلب عليها لكن قدموه بطريقة حلوة جداً واللي أنا استفدت منها لأني لعبت على صعوبة الهارد من أول مره واحتجت احافظ على استخدام الرصاص مع العلم أنه قلة فرصة استخدامها من نهاية القرية إلى القلعة كاملة تقريباً لكن رجع القدرة على استخدامها بجزئية الجزيرة. الأسلحة من اللعبة الأصلية انتقلت كلها للريميك مع أضافة سلاحين جديدة.
انحذف منها كثير؟
اللي زعل كل القاعدة الجماهيرية من كابكوم لما نزل ريميك رزدنت ايفل 3 كان قصير وكأنه جزء من اللعبة مو اللعبة كاملة. وكنا خايفين من هالشيء لأن رزدنت ايفل 4 اللعبة الأصلية طويلة والريميك بياخذ وقت. لكن الريميك تقريباً بطول اللعبة الأصلية والأماكن اللي انحذفت ما انحذفت بالكامل بل اندمجت بمنطقة وحدة وهالشيء اشوفه ذكي. باستثناء الجزيرة, اللي باللعبة الأصلية كانت أقصر من القرية والقلعة لكن مو أقصر بكثير. بعكس الريميك. شخصياً أشوف جزئية الجزيرة جديدة تماماً بالمكان والشكل حتى الأماكن اللي نعرفها تغير شكلها 100% باستثناء البوس فايتس اللي فيها.
تقييمنا لها وهل ننصحك بها؟
تقييمنا لها 9.5 من 10 وننصحكم تلعبونها سواء لعبتوا اللعبة الأصلية أو لا. تجربة ممتعة ورغم طموحنا الكبير عليها وصلت اللي عليها بشكل مبدع ويناسب الوقت والتقنية الحديثة. هل أتمنى أنها كانت أطول؟ أكيد لكن طولها الحالي جيد جداً.
