جمع بي سيك مع لاعب

طبيعي ان‏ أول شي راح تسويه لما تقرر إنك تجمع بي سي بنفسك إنك ترصد ميزانيتين الميزانية الأولى تكون مخصصة للقطع الأساسية والرئيسية للتجميعة والميزانية الثانية تكون للكماليات اللي بتكون مع التجميعة مثل الشاشة والكيبورد والماوس والسماعات ..

 

‏تجميعة القيمنق تكون غالباً مختلفة عن تجميعة المونتاج من ناحية الاداء والقوة والتحمل والي تكون مكونة من عدة أشياء أساسية وتركز عليها بدءاً من الكرت والمعالج ثم الرامات الي يفضل انها تكون 16 قيقا رام ..اما تجميعة المونتاج يكون تركيزك بدءاً من المعالج ثم الرامات الي يفضل يكون 32 قيقا رام ثم الكرت

اختيار المعالج CPU

 

‏المعالج ‏يعتبر من الأجزاء الرئيسية في تجميعتك للبيسي و تنقسم إلى قسمين Intel Core و AMD لكن لازم تعرف توجهك قبل ما تبدأ رحلتك في تجميع القطع فإذا ‏كانت الحاجة من تجميعتك هي فقط للعب فالأفضل إنك تتجه مع انتل أما إذا كان ودك يكون البيسي حقك أوسع و أعمق عملياً من ناحية المونتاج والبث واللعب فالأفضل  إنك تتجه مع AMD الي بيكون هو الخيار الأفضل لك ..

‏إذا اخترت إنك تروح مع أنتل ف بيكون قدامك مجموعة من الفئات اللي تختار بينها وتبدأ من  i3 , i5 , i7,  i9

وتكون متبوعة برقم معين وحرف في الاخير ..

لكن وش تعني هذي الأرقام وعلى ايش تدل ؟ 

انا راح اقولك ، مثلا لو اخذنا على سبيل المثال معالج

‏ intel i7 8700 k لو فككنا رموزها بالتفصيل بتكون قراءتها كالاتي:

‏i7 تعني فئة المعالج و 8 هو جيل المعالج و 700 هو رقم المعالج وترتيبه ضمن هذي الفئة و الK يعني معالج قابل للكسر..

وممكن احيانا تكون بعض المعالجات آخر حرف فيها حرف F وتعني ان المعالج بدون كرت شاشة مدمج..

وطبعاً الي بيحدد اختيارك من بين هذه الفئات هو ميزانيتك و احتياجك لاستخدام للبيسي المناسب لك..

 

ففئة i3 ‏تعتبر الفئة الاقتصادية ومناسبة مع الكروت الاقتصادية  للالعاب اما الi5 تعتبر الفئة المتوسطة ومناسبة للكروت المتوسطة أما الi7 فهو موجه اكثر للاعبين الي يركزون على الدقة والفريمات العالية مع الكروت القوية الي بتكون موجودة ضمن التجميعة اما الi9 فهي اعلى فئة وغالباً تكون موجهة للاعبين الي يبحثون عن أعلى أداء ومواصفات وامكانيات في تشغيل الالعاب و البث و المونتاج ولكن الافضل انك توفر فلوسك لكرت الشاشة وتبتعد عن i7 وi9 وتركز على i5 في رحلتك للتجميعه..

‏اختيار اللوحة الأم Motherboard

 

‏بعد ما تختار المعالج لازم تختار المذربورد ويكون متوافق مع المعالج حقك ..

 المذربورد ‏‏هي القطعة اللي بتوصل كل القطع ببعضها وتنشبك فيها كل ‏مكونات الحاسوب وتربطها في بعضها البعض.. 

اما من ناحية الاحجام فهي مختلفه لكن كلما صغر حجم الماذربورد كل ما راح توفر سعر أفضل، الأشهر من بينها تتوفر بثلاثة احجام للمذربورد ..الحجم الاول 

هو mini -ITX وهو الحجم الاصغر  وفيها تكون فتحتين للرام والافضل انك تبتعد عن هذا النوع 

الحجم الثاني Micro -ATX وهو الحجم المتوسط وفيه اربع فتحات للرام 

اما الحجم الثالث Standard- ATX ويعتبر الحجم الاكبر واغلب الناس تستخدم هذا الحجم لانه يعتبر مناسب لكل القطع ..

بعض اللوحات تدعم خواص مثل توصيل أجهزة الفيديو عالية الوضوح HDMI او الاتصال السريع FireWire وتكون باسعار اضافية ‏عشان كذا لازم تتأكد من توفر بعض الخواص وتشوف هل انت فعلاً تحتاجها او لا ..

ومن اهم مكونات اللوحة الام هي الChipset ووظيفتها انها تتحكم في سير العمليات داخل الجهاز لكنها تختلف حسب نوع المعالج او المقبس الداعم ، فمثلا الشريحة الاولى من الجيل السادس من معالجات انتل والي هي Z-170 راح تتيح لك كسر سرعة المعالج والذاكرة ، اما الشريحة H110 بتكون اقل شريحة وما راح تقدر تكسر السرعة ولا تقدر تضيف الا قطعتين ذاكرة فقط

 

واذا حبيت تقرأ عن أنواع المذربورد أكثر جهزنا هذي المقالة تتكلم عنها بالتفصيل:

كل شيء تحتاج تعرفه عن اللوحات الأم

 

 

الذاكرة RAM

 

‏الرام مهم جداً في تشغيل الألعاب والبرامج ويعتبر ركيزة أساسية من ركائز تجميعتك للبيسي ‏لكن لازم تنتبه لكم نقطة قبل لا تشتري الرام .. اولاً حجم الرام ‏مهم جداً في تشغيل البرامج ‏والألعاب فإذا كنت ناوي تسوي تجميعة للجيمينج أنصحك ب 16 جيجا رام أما إذا كنت تبي تشتغل على برامج إنتاج الفيديو والمونتاج والتصميم فالأفضل إنك تزيد عدد الرامات .. 

‏ثانياً نوع الرام ‏يمكن أفضل وأشهر نوعين اللي هم DDR4 وDDR3 

 

وطبعاً DDR4 هو الاحدث والاسرع ولازم تتاكد هل المذربورد حقك يدعم الرام او لا..

ثالثاً سرعة الرام ، ‏ ‏الرام له عدة سرعات ‏وتقاس بالميجاهرتز وراح يكون موضح لكل رام السرعة الخاصة فيها والسرعة المناسبة حالياً هي اللي تكون بين ‏2400 الى 3200 ‏بتكون كافية لتشغيل البيسي بكفاءة عالية

كرت الشاشة GPU 

 

‏يعتبر أهم قطعة في رحلتك في تجميع البيسي ولازم تركز إنك تحط كل ثقلك المالي في هذه القطعة من ناحية الميزانية .. ‏

كرت الشاشة هو المسؤول عن معالجة الرسوميات في الكمبيوتر ‏او بمعنى اوضح هو اللي يشغلك الألعاب ويتدخل في تعديل الفيديو فإذا كنت راح تأخذ بيسي للقيمنق ف ضروري جداً إنك تأخذ كرت الشاشة المناسب لك لأن إدارة الألعاب يعتمد أداء كلي على كرت الشاشة .. ‏بالنسبة للكروت الموجودة حالياً في السوق ما في الا نوعين هم AMD و NVIDIA وكل الشركتين ممتازه ويقدمون لك خيارات متنوعة وأسعار مختلفة وللأمانة بالنسبة لكرت الشاشة تعتمد في المقام الأول عليك أنت وعلى ميزانيتك وكم راح تقدر تدفع بالضبط لكن دائماً حاول انك تتجه مع أحدث جيل موجود في السوق لأن غالباً تكون هناك قفزة بين كل جيل وجيل والشركات تحاول تنتج أفضل ما عندها مع كل موجة اصدار ..

‏التخزين او القرص الصلب hard disk 

‏‏

‏الألعاب والأصوات والفيديو تتطلب وجود مساحة كبيرة لتخزين الملفات اللازمة لتشغيلها ، حاليا فيه ثلاثة أنواع من الأقراص الصلبة الموجودة HDD ,SSD, NVMe 

‏ولو رتبناها بالترتيب من الأقدم إلى الأحدث راح يكون HDD هو الأقدم والابطأ ولعل افضل شي يميزه هو سعره المنخفض وبعده يجي SSD ويعتبر اداؤه جيد وسرعته ممتازة مقارنة ب HDD وبعدها يجي NVMe ويعتبر هو الاحدث والافضل والاسرع من بين كل الأنواع ولكن سعره مرتفع شوي ولكن مقارنة بالي يقدمه فهو يستاهل سعره بكل تأكيد ، ايضاً لا تنسى قبل لا تشتري تتأكد ان المذربورد حقك يدعم هذا النوع او لا 

مزود الطاقة Power supply

 

مهمة الباورسبلاي انه يزود الجهاز بالكهرباء، الافضل انك تتجه مع اكبر واط تقدر تشتريه لان الواط الأكبر بيعني انك بتحصل على كفاءة استهلاك افضل وايضاً بتقدر تستفيد منه حتى لتجميعات قادمة لأن عمر الباورسبلاي اساساً يكون طويل ويتحمل لفترات زمنية طويلة ايضاً من الاشياء المهمة الي لازم تشيك عليها قبل لا تشتري الباورسبلاي هو وجود ختم 80 PLUS الي بيجيك على عدة الوان تكون بداية من ‏بلس و برونز و سيلفر وجولد و ‏بلاتينيوم و تيتانيوم وكل ما علت الدرجة كل ما كان افضل ..

صندوق الكمبيوتر CASE

 

وهو يعتبر الحاوية الي بتشيل لك كل القطع داخله ويكون متوفر على عدة احجام واشكال مختلفة لكن لعل أشهر ثلاثة أنواع هي mini Tower , mid tower , Full tower 

لكن انت كمستخدم بيكون اختيارك للكيس "صندوق الكمبيوتر" بناءً على حجم المذربورد حقك ، وايضاً من الجوانب المهمة الي لازم تحرص عليها عند اختيارك للكيس عدد المراوح الي يقبله الكيس وهل يحتوي على فلاتر للغبار او لا وهل فيه ميزة الكيبل مانجمنت لان هذي الميزة بتريحك في ترتيب الاسلاك من الداخل ،، او تشوف هل الكيس يحتوي على اماكن تركيب الهاردسكات وتكون متوفرة ومتوزعة بشكل متناسق داخل الكيس او لا  ..

 

والحين لما عرفت كيف تختار قطع بي سيك، تقدر تبدأ تجمعه من خلال هالخاصية الحلوة في لاعب

خاصية جمع جهازك

اخيرا اذا كنت تبي ترتاح من كل هالكلام وتجيب تجميعات جاهزة فاحب اقولك ان لاعب راح تختصر عليك كل الجهد وتوفر لك الوقت لانها سوت لك تجميعات ممتازة وبأسعار جدا رهيبة.