الفرق بين المايك الرخيص والغالي
البث المباشر أو اللايف ستريم هو تجربة ممتعة للمشاهد واللاعب، وممكن تكون فكرت إنك تدخل لهذا العالم وتجرب مثل ناس كثير
لكن تدرك في لحظة وأنت تجهز السيت أب إنه فيه أشياء راح تحتاجها، ومنها صوتك وأنت تتكلم مع المتابعين.
وقبل ما تحدد ميزانيتك لاحظت فيه أسعار مختلفة بين المايكات بس ما تعرف وش الفرق بينها
هنا راح نسوي مقارنة بين ثلاث مايكات:
Razer Seiren Mini
Elgato Wave 3
Razer Seiren Elite
المايكات هذي أسعارها متفاوتة، وبنشوف كل واحد وش يميزه ووش عيوبه
Razer Seiren Mini
من اسم المايك Mini راح تعرف إنه صغير الحجم، وسهل بالتنقل إذا كنت تتنقل كثير أو راح تستعمله في أكثر شي سواء للعب أو ممكن اجتماعات اونلاين وغيرها. في هذي الحالة المايك يكون مناسب لك.
تشغيله وتركيبه جدًا بسيط، كل اللي عليك إنك توصله بالجهاز وراح يتعرف عليه مباشرة، بدون ضبط إعدادات كثيرة.
الصوت فيه مقبول وجيد إلى حد ما، تقدر تعتبره تطوير من مستوى المايك الموجود على سماعة الرأس.
الصوت واضح ولا يعتبر سيئ، يعني المتابعين ما راح يشتكون من الصوت.
يعزل المايك جزء كبير من الصوت من جميع الاتجاهات ويلتقط الصوت اللي قدامه مباشرة بشكل أكبر،
وهذا شي جيد بعزل الصدى في الغرفة وما شابه.
حساسية المايك تعتبر منخفضة، لازم ترفع صوت المايك من الإعدادات عشان توصل للمستوى المناسب، لكن لما ترفعه راح يتشوه الصوت أكثر.
مواد التصنيع تعتبر رخيصة، لكن طبيعي لأن المايك سعره رخيص.
الستاند أو حامل المايك ما يعطيك مجال تحريك كبير، وطوله الصغير يعني إن صوتك راح يكون بعيد لو حطيته على الطاولة وكان بعيد شوي عنك، والكيبورد راح يكون أقرب له بالتالي ممكن صوته مزعج للمتابعين
ولو حبيت يمديك إذا كان عندك ستاند عالي تغيره.
ويعيب المايك هو عدم وجود زر للكتم (Mute)، فلو بغيت تكتم لازم تستعمل جهازك اللي موصل المايك عليه.
المايك راح يناسبك كبداية في المجال، ولأن سعره رخيص تقدر توفر لاكسسوارات إضافية مثل ستاند مايك أفضل للتحكم وأقرب لك.
Elgato Wave 3
نجي لنوع أعلى سعرًا
مثل المايك السابق، ميزته إنه يعزل الصوت من الجوانب بشكل كبير وأفضل من المايك الأرخص، وجودة الصوت أفضل منه.
حساسية الصوت أعلى فما تحتاج ترفع الصوت من الكمبيوتر لأعلى شي عشان تقدر تسمع زين، ومعناها يعطيك خيارات تحكم بالصوت أفضل بناءً على نبرة صوتك.
وجودة مواد التصنيع أفضل، لأنك دفعت أكثر.
الستاند راح يكون أعلى ارتفاعًا، لكن ما يزال الأفضل تركبه على ستاند كبير ويكون بعيد عن الطاولة والكيبورد.
لكن هنا نشوف أكبر الفروق، حجم المايك كبير، يعني التنقل فيه أصعب لكن مب بالشكل الكبير، لكن المايك اللي قبل أكيد أريح بالتنقل.
بس هذا يعني إنه فيه ميزات إضافية، لأن الحجم كبير عندك زر دائري لرفع مستوى الصوت من المايك نفسه، بدون الدخول لشاشة الإعدادات، وتقدر تشبك سماعة على المايك مباشرة وتتابع الصوت مباشرة وبدون تعقيد، وتقدر ترفع وتنزل صوت السماعة من نفس الزر الدائري، وتقدر تغير بمستوى دمج صوت اللعبة أو الكمبيوتر مع صوتك، خياراتك أكثر بكثير.
وما ننسى تقدر تستعمل نفس الزر لكتم الصوت، أو تقدر تلمس المايك من فوق ويكتم الصوت عشان ما يطلع صوت الزر الدائري، لأنه مزعج شوي.
ومع المايك يجي برنامج Wave Link لتحكم بخيارات أكثر بالصوت.
تصميم المايك المستطيل صحيح إنه حلو، لكن راح تعاني معه إذا ما كنت مركز زين وتحتاج توجهه بشكل صحيح عشان تاخذ أفضل جودة صوت.
Razer Seiren Elite
الصوت راح يكون أفضل بكثير والعزل يكون أفضل أكيد، لكن التشابه يوقف هنا.
حجم المايك الكبير يصعب التنقل فيه، لكن معناها إنه عدد أزرار التحكم أكثر ومنفصله عن بعضها، على عكس مايك Elgato اللي تستعمل زر واحد لكل شي، زر لرفع حساسية المايك، وزر رفع صوت السماعة المتصلة فيه، وزر كتم الصوت.
جودة التصنيع عالية والستاند يعطيك حرية تحريك ممتازة لو كنت ما راح تستعمل ستاند مختلف.
التصميم الدائري (أو شكل أنبوب) يسمح للمايك إنه يلتقط الصوت من فوق، وهذا يعطي مساحة لفلتر High-Pass إنه يشتغل بشكل أفضل لعزل الترددات الصوتية اللي ممكن تخرب الصوت، Elgato عنده نفس الخاصية لكن جودته أضعف.
يجي مع المايك في اسفنجة الصوت، اللي تمنع صوت الهواء يدخل مباشرة ويخرب التسجيل، على عكس المايكات السابقة اللي ما يجي معها أي اكسسوارات إضافية وإذا بغيت تشتريها بشكل منفصل.
وجودة الصوت أعلى بمراحل كثيرة ممكن الحالها تخليه يستاهل سعره.
الخلاصة
الفرق بالسعر ما يعني فقط إنه العلامة التجارية اللي صنعته تبي تستغل الناس، لكن التقنيات والهندسة لكل مايك تختلف من فئة سعرية إلى أخرى.
ما يعني هذا الشي إن المايك الرخيص سيء، إنما الخيارات الأكثر والإضافات في المايكات الغالية تعطيك مساحة تطوير وتحسين للمحتوى اللي تعرضه.
الصوت في أي فيديو سواء كان مقطع يوتيوب أو بث مباشر على تويتش، هو أهم شي ممكن من بين المعدات.
الناس ممكن تسامحك على جودة صورة متوسطة أو حتى سيئة، لكن إذا ما يقدرون يسمعونك زين، ما راح يكملون ويتابعون معك.
إبدأ بالفئة السعرية اللي تناسبك، وحط في بالك الإكسسوارات اللي تحتاجها، وحاول تشتري اكسسوارات تسمح لك تستعملها مع أي مايك جديد تشتريه في المستقبل.
لطلب المنتجات المذكورة في المقالة:
كل المايكات