وش تحتاج عشان تسوي بث

لما تلعب أونلاين مع أصدقائك، تصير مواقف كثيرة منها الحلو ومنها المضحك ما تنسونها

لكن في بعض الأحيان لما تلعب لحالك ودك بأحد يستمتع معك باللعبة

 

عشان كذا ناس كثيرة تجيهم فكرة البث المباشر للألعاب

بس السؤال، كيف تسوي بث للألعاب، وأيش تحتاج؟

 

وهنا راح أساعدك وأبسط لك الفكرة وأعلمك وش تحتاج عشان تبدأ تسوي بثوث وتكون ستريمر

 

جهاز ألعاب قوي

 

لو كان جهازك يشغل ألعاب على جودة متوسطة، راح تكون تجربة البث مزعجة مرة لك، الجودة راح تكون أسوء والمتابعين راح يشوفون جودة لعبة سيئة ولا راح يستمتعون

لأن البث يحتاج إلى جهاز PC بأداء عالي، وراح ياخذ من قوة جهازك اللي في الأساس ممكن هو يعاني بتشغيل بعض الألعاب

 

لمّا تختار جهازك، احرص يكون PC قيمنق من الفئة المتوسطة Mid Level أو أعلى، وتقدر تطلب لك واحد جاهز او تجمعه بالقطع اللي تناسبك من خدمة جمع جهازك هنا

 

برنامج OBS أو أي برنامج بث

 

في حال ما قد سمعت فيه، هو برنامج لإعداد البث المباشر، تقدر تضيف فيه معلوماتك مثل حسابك في انستقرام أو يوتيوب، أو تضيف شعارك أو حتى صورتك.

 

والبرنامج هذا ميزته إنه مجاني، لكن تحتاج تتعلم عليه شوي، وهو بسيط فما راح يتعبك

ومن خلاله راح يمديك تسوي بث من الكاميرا واللعبة بنفس الوقت

 

 

الكاميرا

 

المحترفين في العادة راح يشترون كاميرات احترافية عشان يصورون أنفسهم وقت البث وتشوف ردود فعلهم،

لكن في نفس الوقت، في كثير من الأشخاص بدايتهم كانت بكاميرا ويب كام، فهذا خيارك الأول في هذا الوقت

مثل كاميرا Logitech C270 HD Webcam راح تكون خيار جدًا ممتاز في بداية مشوارك

 

لكن بنفس الوقت، إذا عندك كاميرا احترافية أو شبه احترافية مثل كاميرات الكانون والنيكون، على حسب نوعها

تقدر تخليها هي الويب كام للبث من خلال كيبل HDMI، لكن راح تحتاج قطعة تسمى بـ Capture Card مثل

 Elgato Game Capture. معدات الستريمنق متوفرة هنا

 

 

 

المايك

 

على عكس الكاميرا، المايك حاول ما تستخسر قيمته، حتى لو جودة الكاميرا مقبولة نوعًا ما، إذا كان الصوت سيئ ما راح يستمر جمهورك بالبث وراح يتركونه (من تجربة شخصية)، الكاميرا ممكن تتخلى عنها في حال ما كنت راح تظهر وجهك، لكن الصوت مهم وأهميته كبيرة، وخيارات المايكروفونات كثيرة مثل Razer Seiren Mini يعتبر سعره حلو وحجمه ما راح يسبب لك زحمة، أو اختر مايك من سلسلة Elgato Wave لمستوى أعلى، وإضافة حلوة لو أخذت فلتر لصوت الهواء 

 

إضافات مستقبلية، أو الحين لو بغيت

 

في حال كنت جازم ومستعد تخصص وقت كبير للبث وتحاول تكبر، تقدر تستثمر في إضاءات بسيطة تضيف للمنظر، أو حتى تنور عليك في حال كانت الصورة من الويب كام مظلمة، تقدر تختار أي نوع يناسبك.

  لخيار يضيف جمالية أكثر تقدر تطلب  شريط إضاءة RGB أو تقدر تختار أي اضاءة ثانية وتشكلها بأي شكل مناسب لك من قسم الاضاءات

 

وفي حال كنت راح تتفنن بالبث وتسوي حركات كثيرة في الشاشة مثل gif أو تظهر أو تخفي الشات

تقدر تستفيد من قاعدة تحكم بالبث مثل Elgato Stream Deck Mini كخيار اقتصادي بـ6 أزرار

أوتقدر تطلب خيارات أكثر احترافية من قسم ادوات الستريمنق

 

أهم شيء في السيت اب: إنك تبدأ!

 

نحرص دائمًا نجيب أفضل المعدات والأجهزة والقطع، ونتعب وحنا ندور الصورة المثالية من الكاميرا أو سيت أب بث احترافي بالكامل، وكل هذا بس عشان نجرب.

والحقيقة إن أول شي تحتاجه عشان تبدأ وتكون ستريمر، هو إنك تشغل اللعبة وتجهز البث، وتبدأ.

خلي بدايتك بسيطة مثل أي ستريمر، بأبسط المعدات ولا تشيل هم وتعلم من الأخطاء ومع الوقت راح تكون من أكبرهم بإذن الله.