كيف تبدأ بأول سيت اب قيمنق

نقدر نقول مبروك البي سي الجديد؟ سواء بي سي ولا كونسول أكيد أنك تبغى تعرف كيف تبدأ بأول سيت اب قيمنق. ممكن ماتكون أول سيت اب وحتى لو ناوي تجدد السيت اب, أكيد أنك متحمس بس الحماس في الرتيب يقلب قلق من تساؤلات كثير تجي مع كل سيت اب. من وين ابدأ؟ و اشتريها كلها اونلاين؟ هل اجمع لها ولا اشتري قطعة كل ما حصل لي؟ كم يبي لها ميزانية؟ وممكن اسئلة أكثر بس جهزنا لك هالمقال عشان يساعدك من وين تبدأ وتعطي الأولوية لأيش قبل عشان تقدر ترتب لك سيت اب محترم. 

 

كونسل ولا بي سي قيمنق  (الأولوية: عالية):

 

سواء كونسل أو بي سي قيمنق, خلونا نقول جهاز القيمنق هو قلب السيت آب وعلى الأغلب معاك جهاز و ودك ترتب سيت اب حوله. البي سي اللي تشتريه ممكن تشوفه غالي بالبداية لكن يعتبر استثمار من ناحية تغيير القطع إذا حبيت تطور آدائه بدل ماتغيره كامل. وعلى حسب ميزانيتك ونوع الألعاب اللي تلعبها وحتى شلتك إذا يلعبون كونسل ولا بي سي هذي هي أهم العوامل اللي تساعدك تقرر. بس لأنك تبحث عن السيت اب أكيد أن الجهاز صار عندك وما تحتاج مشورة فيه. 

شاشة أو تلفزيون (الأولوية: عالية):

 

الشاشة أساسية لأي سيت اب قيمنق ومواصفاتها مرتبطة بالانغماس اللي تحتاجه بتجربتك للقيمنق. والشاشة حتى لو كانت غالية تُعتبر استثمار إذا كان معدل تحديثها عالي ومقاسها كبير ودقتها عالية تعيش معاك لسنين. بس تذكر المساحة اللي عندك بالغرفة اللي بتكون فيها السيت اب. ولو كانت ميزانيتك ماتسمح تقدر تبدأ بشاشة عندك بالبيت أو مستخدمة إلى ماتقدر تجيب اللي في بالك. 

 

كرسي قيمنق وطاولة قيمنق (الأولوية: متوسطة) 

 

الراحة وقت القيمنق مهمة جداً خصوصاً وقت الجلسات الطويلة. اختيار طاولة تناسبك بالحجم والراحة وتناسب المساحة اللي عندك ومن حسن الحظ أن اسعار الطاولات معقول جداً وهذا يسمح لك تركز على ميزانية الكرسي. لأن؛ بالفترة الأخيرة كثرت كراسي القيمنق بأسعار منخفضة؛ لكن لازم تتذكر أن الهدف من كرسي القيمنق هو الراحة. والراحة تبي جودة. الأغلب يحسب كرسي القيمنق بس شكل زي قيمرز اليوتيوب والتويتش. ركز على جودة الكرسي أكثر من الشكل وبتلقى الراحة. 

 

الأجهزة الجانبية (الأولوية: متوسطة) 

 

أجهزة القيمنق المرتبطة بالنظام زي الكنترولر للكونسل أو الكيبورد والماوس للبي سي من أهم أجهزة السيت أب وتعتبر استثمار لأن كل ماحافظت عليها تعيش معاك أطول. ممكن تبدأ بكيبورد وماوس تعطيك الأشياء الأساسية ثم تنتقل لكيبورد على ذوقك وتذكر أن هذي الأجهزة تحسن آدائك بالقيمنق. ممكن تبدأ ببدائل أرخص مثل مجموعة كيبورد وماوس وماوس باد مارفو وهي مو سيئة للمبتدئين. ثم تحول للي يناسبك بجودة عالية مثل كيبورد ريزر بلاك ويدو. 

 

السماعات (الأولوية: متوسطة) 

 

كلنا بدأنا من سماعات متواضعة وتعلمنا أن دقة الصوت هي أحد أهم الأشياء اللي تخدمنا بالقيمنق ومع تطور التيكنولوجيا والهندسة الصوتية بالألعاب, صارت جودة الصوت مطلب والعزل والعُمق في آداء الصوت بحيث تعرف مصادر الأصوات واتجاهاتها بالألعاب مطلب مانستغني عنه. وممكن تلقى هذي المواصفات لكن في سماعة مو مريحة ماتناسبك ولما تطول فيها تبدأ تحس بألم بالرأس. لكن سماعات قوية مثل سماعة استرو آي 50 بآداء قوي على جميع المعايير تعطيك الجودة والراحة مع بعض وأغلب اللاعبين متفقين عليها. لا تستخسر فيها أي مبلغ تدفعه لأن آدائها يعطيك كل شيء تحتاجها وأكثر.

 

إضاءة LED (الأولوية: منخفضة) 

 

مايغير أجواء السيت آب ويعطيها مزاج معين يتناسب مع ذوقك إلا إضاءة السيت اب. باختصار هي الاكسسوار اللي يعطي السيت اب حقك معالم وتساعدك تنغمس بالقيمنق خصوصاً لما تسكر الإضاءة الرسمية للغرفة وتخلي إضاءة الـ LED تعكس على جدران الغرفة. ابدأ بشريط LED بسيط وسعره رمزي. ثم ابدأ بالتعديلات اللي تناسب ذوقك واحتياجك. جرب تتصفح قسم الإضائات في لاعب. 

 

اكسسوارات جانبية (الأولوية: منخفضة) 

ماوس باد, قاعدة شحن ليد الكونسل, قاعد شحن للسماعة, عدة البث من مايكرفون وكاميرا وغيرها. كلها ممكن تحتاجها أو تقدر تجيب بدائل لها حسب نوع الألعاب اللي تلعبها أو ممكن إذا تبغى تكمل السيت اب كامل. كلها تقدر تحطها بقائمة امنياتك في متجر لاعب عشان لما تكون جاهز تشتريها مايحتاج تجمعها من أكثر من موقع. 

 

 

باختصار أول سيت اب دايم الشغل عليها حماس, صحيح أغلب القطع اللي فيها ممكن تكون مستخدمة أو بديل أرخص بس الحماس لها غيييير. مهم جداً تتذكر قائمة الأولوية ركز على الأساسيات أول والأشياء الجانبية تقدر تغيرها متى ماقدرت.. ضروري تركز على المساحة اللي عندك للسيت اب وتعرف مقاساتها؛ عشان تختار قطع السيت اب اللي ماتكون كبيرة على المكان. وتذكر أن أول سيت اب مستحيل تكون مثالية من ناحية الجودة والراحة والميزانية. عادي يكون ناقصها أشياء وفيها قطع مؤقتة. الهدف في السيت اب الأول أنك تكمله وماتدقق بالتفاصيل.