ليش بعض الألعاب مجانية 

 

ألعاب الفيديو هي أحد أهم عناصر الترفية في عصرنا هذا واللي نعرفه أن أغلب الألعاب بمختلف المنصات تدفع عليها سعر معين بناء على محتوى اللعبة وطولها عشان تلعبها وتكون بمكتبتك. سواء بشكل مادي مثل الأشرطة أو تشتريها من ستور بمبلغ معين. لكن في وقتنا الحالي زادت الألعاب المجانية وخصوصاً ألعاب الأونلاين. وش السبب ووش يستفيد مطورين اللعبة؟ 

 

لما نقول ألعاب مجانية يمكن يجي على بالك فورتنايت أو ببجي لكن بداية تاريخ الألعاب المجانية يرجع إلى 1980 لما اشتهرت طرق توزيع بأسم Shareware وهذي الطريقة كانت وسيلة لمطورين الألعاب المستقلين بأنهم يخلون الناس تجرب ألعابهم بسعر رخيص جداً أو حتى مجاني في بعض الأحيان كطريقة لنشر أسم مطور اللعبة للعلن وإعطاء الفرصة للناس بأنها تتعرف على ألعابه. وأغلب الألعاب في Shareware كانت تخليك تجربها مجاناً لمدة معينة, أحد أشهر هذي الألعاب هي Doom و Wolfenstien و Duke Nukem. وكانت Shareware ناجحة في هذاك الوقت خصوصاً لمطورين الألعاب المستقلين. 

شهرة الألعاب المجانية (F2P) 

 

الألعاب المجانية أو الـ Free-To-Play والفرق هنا باللغة الإنجليزية يوضح أكثر لأن Free To Play ماتعني تماماً Free Game. الألعاب المجانية اللي صار الكل يلعبها الآن هي اللي تندرج تحت مسمى Free To Play وهي ألعاب تقدر تحملها وتلعبها كاملة أو تكمل تلعبها مع كل تحديث بدون ماتدفع أي مبلغ مقدم لكن فيها عناصر أضافية غير مجانية. أشهر هذي العناصر المدفوعة هي السكنات أو ملابس الشخصيات وأزيائها من لبس وأكسسوارات وألوان وغيرها. وأول من بدأ هذا التيار كانت الألعاب الشرق آسيوية مثل Maple Story و Ragnarok Online و Nexon's Dungeon Fighter Online. 

 

ومع أن هذا النوع هو اللي رفع شهرة الألعاب المجانية من جديد لكن فيه مشاكل المطورين صعب يوازنونها مثل أنهم يخلون اللعبة عادلة للاعبين اللي يدفعون مبالغ مادية واللاعبين اللي اختاروا أنهم مايدفعون. أو أنهم يخلون مثلاً اللعبة صعبة وتعجيزية للاعبين اللي مايدفعون مبلغ مادي وكأنك تقدر تشتري المهارة في اللعبة. ومثل هذي الألعاب وصفها الكثير "بألعاب غير أخلاقية" لأنها تحطك في موقف يرفع ضغطك لدرجة تضطر تشتري شيء من اللعبة ماكنت ناوي تشتريه. ومنها طلع مصطلح (Pay To Win) أو أدفع للفوز لأنها تحطك بموقف تعتمد فيه على المبلغ اللي تدفعه أكثر من مهارتك باللعبة. 

 

أثر الألعاب المجانية 

 

ممكن الكثير يركز على سلبيات الألعاب المجانية لكن بالأخير أثرها الإيجابي أكثر من السلبي ومنها شفنا كثير ماكان يفكر يلعب قيمز تلقاه الحين يلعب ببجي أو فورتنايت أو أحد هذي الألعاب المجانية. باختصار الألعاب المجانية سمحت لنا نلعب مع شريحة ناس مو حتى قيمرز لكن لأن اللعبة سهل تجربتها والوصول لها وتقدر تجربها حتى لو ماكنت مقتنع تلعبها بس لأنها مجانية وكل اللي عليك تحملها. وهذا أيضاً سبب نجاحها لأن معظم الناس تكمل في الألعاب اللي فيها أصدقائهم أو حتى قاعدة لاعبين كبيرة. 

 

والسبب اللي يفضله القيمرز أن مطورين الألعاب يقدرون يخاطرون بمفهوم اللعبة وأسلوبها لأنها بالنهاية مجانية ومافيها خطر خسارة مبيعات. يعني في الآونة الأخيرة شفنا أنواع ألعاب كثيرة ساهمت في تنوع كبير حتى لو معظمها مانجح لكن كقيمرز دائماً نتطلع للتوجه الجديد بالألعاب مثل لما Among Us سوت ظاهرة عالمية وجزء من نجاحها اعتمد على أنها مجانية أو بسعر رمزي. 

 

التساؤل مازال موجود ليش بعض الألعاب مجانية ووش يستفيد مطورينها وشركتها؟ 

 

تختلف أنواع الألعاب المجانية وتتنوع حسب معيار الربحية فيها. 

 

 

الألعاب اللي تجني ربحها من الأعلانات: واللي هي مثل ألعاب الجوال أو أغلب ألعاب الجوال لسهولة طرح الإعلانات فيها بعكس الأجهزة المنزلية. مثل كاندي كرش وانجري بيرد وغيرها

 

الألعاب نصف المجانية: وهي الألعاب اللي ماتطلب منك مبلغ مقدم عند شرائها لكن بعض مراحلها أو الباتل باس يأثر على تقدمك باللعبة مثل. كلاش اوف كلانز و فورتنايت و روبلوكس. 

 

الألعاب مفتوحة المصدر: أو الألعاب اللي تسمح لك تفتحها وتعدل عليها وتضيف وتحذف أو حتى تضيف على كود اللعبة مثل. ماينكرافت و SuperTuxKart و 0 A.D.

 

ألعاب بـ دوماين عام: وهالألعاب تقدر تقول عنها سبيل. فكرتها وشكلها مافيه حقوق أو ملكية فكرية مثل. تترس و كانسة الألغام والأفعى. 

 

الألعاب المجانية مؤقتاً: وهي ألعاب تكون مجانية في مناسبة معينة مثل أول ماتنزل أو حتى مع اشتراك مثل بلايستيشن بلس أو قيم باس وغيرها والهدف هو جمع عدد لاعبين كبير في فترة قصيرة تقريباً شهر والأمثلة كثير على هذي الألعاب. 

 

الألعاب المُصممة من اللاعبين: وهذي ألعاب يصممها محبين سلسلة معينة بدون مايجيهم أي دعم من شركة السلسلة تكون ألعاب صممها ناس حٌباً في لعبة معينة ومن غير مقابل مثل. Pokémon Uranium و Sonic Mania و AM2R.

 

 

التوجة للألعاب المجانية الآن زاد أكثر من أي وقت فات وحتى الألعاب اللي كانت بسعر معين بعضها صار مجاني الآن; لأن بعد جذب قاعدة لاعبين قوية ومخلصة بيكون شراء الأضافات داخل اللعبة مهمة سهلة لشركة التطوير لكن بعض الألعاب هدفها غير ربحي وتقدم لك قصة وقيم بلاي بدون أي أضافات مدفوعة أو عدد قليل منها مثل. Star Wars The Old Republic و Doki Doki Literature Club وكثير مثلها.