إذا كنت تقرأ بالساعات فأكيد أنك تدور ساعة ذكية تخدمك وتوافق احتياجاتك عشان تشتريها. نبشرك أن هذا المقال هو كل اللي بتحتاجه عشان تعرف وش الأشياء اللي لازم تعرفها قبل ماتختار الساعة اللي بتشتريها. 

 

الساعة الرياضية ولا الساعة الذكية؟

أول وأهم سؤال لازم تسأله نفسك هو هل احتاج ساعة ذكية ولا ساعة رياضية؟ لأن كثير من مستخدمين ساعة أبل بيقول لك اشتر ساعة عشان تتابع صحتك ودقات قلبك ونومك وخطواتك وغيرها. لكن هذي خصائص الساعة الرياضية اللي عادةً تكون بربع سعر الساعة الذكية. 

 

وش هي الساعة الذكية؟ 

باختصار وبساطة هي نسخة مصغرة من جوالك, تعطيك المختصر المفيد من الجوال من غير ماتنغمس بأشياء تضيع وقتك بالإضافة إلى خصائص الساعة الرياضية كاملة. يعني تعطيك التنبيهات المهمة. يفتح لك تطبيقات بسيطة, تقدر ترد على الرسائل المهمة بتسجيل صوتي وترد على المكالمات المهمة بسبيكر وتقرأ إيميلاتك. ومثل ماذكرنا جوالك بس نسخة مصغرة. وفوق هذا كله تعطيك ميزات الساعة الرياضية من حساب خطوات وتذكير بشرب الماء وكل خصائص الساعات الرياضية اللي نحبها. البعض يشوف الساعة الذكية هي توصيلة من الجوال ومايقدر يعيش بدونها لانه ينسى يشيك جواله أو ينسى جواله ككل. 

 

أهم المميزات بالساعة الذكية. 

مثل أي اكسسوار يرتبط بالجوال مثل سماعات البلوتوث وغيرها. الارتباط بين ساعتك وجوالك بيكون اسرع وأقوى وبتستفيد من كل المميزات إذا جوالك وساعتك من نفس العائلة يعني جوالك ايفون وتبي ساعة ذكية؟ ساعة أبل أفضل خيار لك. جوالك سامسونج؟ ساعة سامسونج أفضل خيار وهكذا. 

فرق السعر بالساعة الذكية

المهم أنك تعرفه أن فرق السعر بين ساعات كل علامة تجارية هو الحجم والتخزين بالإضافة للإسوارة اما المهام والمواصفات الداخلية فغالباً تكون مطابقة لبعض أو على الأقل قريبة جداً من بعض.

 

أقوى الساعات الذكية

قبل ماتعرف أفضل ساعة ذكية تذكر أن كل الساعات في هذي القائمة هي أفضل الساعات لسنة 2023 ومافيه فرق بينها إلا عوامل بسيطة جداً وتعتمد الفروقات على التفضيل من الناس. 

 

1- ساعة ابل الجيل الثامن

2- ساعة سامسونج 6

3- ساعة قوقل بيكسل 

4- ساعة ابل SE

5- ساعة فيت بيت سينس 2

ليش ماذكرنا ساعة ابل الترا؟ لأنها دبل سعر ابل واتش 8 بفرق بسيط جداً. لكن الساعات الخمس المذكورة كلها تتمتع بنفس المميزات تقريباً الفرق الأكبر هو الشكل والتوافق مع الجهاز أما المواصفات الداخلية كلها تقدم نفس الخدمات وفيها نفس الحساسات والتطبيقات اللي تقدم نفس الوظائف. 

 

باختصار الساعة تخدم حاجتك وكل شخص حاجته بالإلكترونيات مختلفة لكن إذا جوالك من شركة ثانية الأفضل أنك تشتري ساعة ذكية من نفس شركة جوالك. وإذا حاجتك رياضية الساعات الرياضية تغلب على الساعات الذكية بالوظائف والسعر. الاختيار بالنهاية غالباً يعتمد على احتياجك وقدرتك ونوع جوالك.