فيفا 22 هل هي صدق نفس فيفا 21 ولا لا؟
اللعبة الكروية المشهورة FIFA 22 ترجع لنا بجزء جديد
عارف وش راح تقول: ما فيه شي جديد…
وسعيد إني أقول لك: لا فيه… هالمرة EA عطونا إضافات تستاهل للقيمرز اللي يحبون الكورة
محرك جديد
إذا ما تعرف وش معنى محرك اللعبة، حاب أعرفك على أحد أهم عناصر تجربة اللعبة.
لعبة فيفا 22 بفضل محركها الجديد راح تعطينا أول شي جودة رسومات أعلى من السابق، وحركة جمهور ولاعبين أفضل وأكثر سلاسة، لدرجة إن الجمهور لما توجه له الكورة راح تلاحظهم يتفاعلون معها ويبعدون عنها.
هي ملاحظة بسيطة ممكن ما راح تنتبه لها، والتحسينات هذي جاية للجيل الجديد من الأجهزة المنزلية للألعاب مثل PS5
لكني حاب أعلمك إنه التحسينات مو للجيل الجديد فقط، حركة اللاعبين وتفاعلهم مع الكرة في الملعب صارت أفضل، وتجاوبهم مع كل شي في الملعب من لاعبين وتصديات للكورة صارت أكثر دقة، التمريرات صارت أسهل وأدق وأقرب للواقع، وهذا شي راح تلاحظه على كلٍ من الجيل الجديد والسابق من الأجهزة.
الذكاء الصناعي
تجاوب اللاعبين في الملعب صار أفضل فيزيائيًا بفضل المحرك الجديد، لكن أدائهم صار فيه فرق ملحوظ، الحراس صاروا أكثر واقعية بالتصدي للأهداف، وتركيزهم على الكرة صار أفضل بشكل ممتاز، اللاعبين وتجاوبهم مع خطة اللعب صاروا فيها أكثر دقة، لدرجة إنك لو تبغى تنفذ هجمة على هدف الخصم، راح تواجه صعوبة في تجاوز خط الدفاع، وهذا الشي راح يعطيك تحدي جديد، ويخليك تفكر في تمرير الكرة قبل ما تنفذها عشوائيًا وتخسر الهجمة.
تطويرات إضافية
طور Pro Clubs حصل على تحديثات تزيد من المنافسة، الحين صار يمديك ببساطة تلعب مع أحد أصدقائك مباراة سريعة، بس ترسل له الدعوة وتبحث عن مباراة عامة، وتلعب.
فيفا Careers صار فيه إضافة جديدة إنك تقدر تسوي فريق جديد، الشي اللي ما كان يمديك تسويه في فيفا 21.
كل اللي عليك إنك تختار فريق وتبدله بفريقك، راح تسوي الشعار والملعب وتقدر تستحوذ على لاعبين في حال كان عندك الفلوس الكافية.
طور Volta صار فيه إضافات جديدة، اللعبة تخلت عن نمط القصة، لكن أضاف خصائص عديدة وغريبة، مثل القدرات الخارقة.
مثلًا سرعات خارقة وركلات "مميتة"، جانب ممتع صراحةً لتغيير الجو.
تغيرت اللعبة؟
من وجهة نظري إيه تغيرت، في الأول والأخير هي لعبة كورة، يعني ما تتوقع قصة وسيناريو وتمثيل، ولا طريقة لعب جديدة لأنها أكيد لعبة حقيقية تحاكي العالم الواقعي، فالإضافات والتطويرات دائمًا شي مرحب فيه.
لكن تقريب اللعبة للواقع أكثر وأكثر… هو الهدف.