الفرق بين الواقع الافتراضي VR و الواقع المعزز AR
الفرق بين تقنية الـ VR و AR
عالم التكنولوجيا تطور واشكال اللعب اختلفت بشكل كبير عن السابق. الألعاب ماصارت بس ضغطت زر على جهاز, صار يمديك تنتقل لعالم اللعبة او حتى تجيب اللعبة لين عندك. في هذه المقالة بنتكلم عن تقنية الواقع الإفتراضي أو ال VR و الواقع المعزز AR اللي الاغلب مايفرق بينهم و بنكتشف ايش الفرق الحقيقي بينهم.
الواقع الافتراضي (VR) :
الواقع الافتراضي هي تقنية محاكاة للواقع تعيشك شعور عالم اخرى تماماً تقدر تتحرك فيه وتعيش بداخله عن طريق نظارة مثل نظارات بلايستيشن PS VR للواقع الافتراضي المعروفة, ونظارة Meta Quest للعالم القادم على كلام التقنيين الـ Meta Verse وكل هذي النظارات حالياً تجي معاها سماعات وقفازات أو يدين تحكم عشان تعيش التجربة الكاملة.
هالتقنية تتعقب تحركاتك و راح تفصلك عن عالمك وتدخلك بالعالم اللي اخترته واحياناً يمكن تنسى وين انت بالواقع لأنها ممكن تعزلك بشكل كامل عن محيطك مجرد ماتشتغل النظارة ويمكن تكون بغرفتك بس بالنظارة انت واقف بطرف جبل. هالتقنية مو فقط للألعاب حتى استخدمت بشكل رسمي بتدريب الطيارين والاطباء وهذا يوضح لك جودة التقنية وكيف هي قادرة على توفير بيئة واقعية.
في الفترة الاخيرة كثير من الالعاب بدت تعطي هذه التقنية اهتمام كبير مثل لعبة Horizon VR Call of the Mountain (هورايزن نداء الجبل) , اللي تعتبر من احدث العاب الـ VR هالسنة, محبين لعبة هورايزن جتهم فرصة يعيشون داخل عالم ايلوي ويعيشون تجربتها بالقتال والتسلق بعالم جميل مع تقنية VR اللي بتاخذهم داخل عالم اللعبة حرفياً.
الواقع المعزز (AR) :
تقنية الواقع المعزز هي تقنية تدمج عالمك الحقيقي مع العالم الافتراضي من خلال كاميرة جهازك. ماتحتاج جهاز خاص فيها "للآن" الاشياء اللي حولك ماراح تتغير في عدسة الجهاز اللي معاك لكن بينضاف لها رسوم متحركة من عالم اللعبة اللي تلعبها. هالتقنية غالباً تستخدم على الجوالات و الاجهزة المحمولة عشان تقدر تتنقل فيها بسهولة وتشوف واقعك المعزز كيف بيكون.
و بالفترة الاخيرة صارت طريقة لتسويق منتجات بعض محلات الأثاث لانك بتقدر تشوف شكل الاثاث ببيتك كيف بيكون قبل ماتشتريه. حتى فلاتر السناب شات اللي اغلبنا يستخدمها تعتبر ايضاً واقع معزز لأنها تضيف على الصورة الواقعية ألوان وأشكال وتعديلات آليه.
وماننسى أشهر الالعاب اللي تدعم الـ AR (الواقع المعزز) هي Pokémon GO وهي من أول الالعاب اللي جذبت الأنظار لتقنية الـ AR و سوت ضجه بوقت نزولها وتعجب الناس من قوة التقنية اللي تقدر تجيب بيكاتشو لباب بيتهم. ومن هنا بدت التقنية تنشهر اكثر واكثر بكل المجالات مو فقط الالعاب.
كل التقنيتين ساعدت مجالات كثير انها تستفيد منها بطريقة تفيد المجتمع و طبعاً ساهمت في تطور الألعاب و واقعيتها. لكنه سهل جداً انك تتلخبط بين الواقع الافتراضي والواقع المعزز و ما تفرق بينهم لانهم يتشابهون بشكل كبير و عشان كذا وضحنا لكم اهم الفروقات بينهم بهذه المقالة.
تقنية الواقع الافتراضي VR اخذت صيت أكبر من الواقع المعزز AR لان الاجهزة لها تعددت ووضحت استخداماتها لكن لو دخلنا بتفاصيل الحياة اليومية ممكن يكون مستقبل الواقع المعزز AR أفضل من ناحية التحول من الجوالات اللي نستخدمها الآن للتقنية اللي بعدها الواقع المعزز ممكن يلعب دور كبير فيها. مثل أننا نلبس عدسة معينة ونبدأ نشوف فيها الرسايل والشغل على مكاتبنا بشكل الكتروني بدل مانستخدم جوال أو جهاز. ولو نشيل هذي العدسة يرجع عالمنا زي قبل.
من أهم الأجهزة اللي تقود السوق حالياً في تقنية الواقع الافتراضي VR هي Playstation VR 2 و Oculuc Quest 2 و HTC Vive Flow مع بعض نظارات الواقع الافتراضي الآن تدعم تقنية الواقع المعزز في نظارة بلايستيشن VR 2 و اكيولس كويست 2.
أما تقنية الواقع المعزز ظهرت لها نظارة Lenovo Star Wars للعبة ستار وارز وقدمت نظرة للمستقبل بشكل مبهر. أما نظارة HoloLens 2 من مايكروسوفت قدموا فيها تقنية سابقة لعهدها وشخصياً أشوفها ممكن تكون تخدم أكثر من نظارات الواقع الافتراضي اللي اخذت صيت أكبر.