أشياء لازم تعرفها قبل تشتري بي سي قيمنق
الناس صارت تحب تلعب كثير، و بي سي القيمنق يعتبر أفضل خيار للألعاب
وكثير من الألعاب الجديدة في السنوات الأخيرة صارت تطلقها استديوهات وشركات صغيرة
وتكلفة تطوير هذي الألعاب على أجهزة الكونسول (بلايستيشن واكس بوكس) تعتبر عالية.
عشان كذا نشوف ألعاب البي سي عددها أكبر وتنوعها أكثر
والحين أنت تبغى تجرب هذي الألعاب وتستكشف عالمها الكبير
بس… ما عندك بي سي قيمنق، ولا تعرف كيف تختاره؟
أنا هنا راح أعلمك وش تحتاج تعرفه بكل بساطة!
وبالمناسبة… ترا الموضوع سهل.
أولًا: كم ميزانيتك
هذا أهم شيء لازم تعرفه.
وخلك واقعي مع نفسك، لأن بي سي القيمنق لو تدفع عليه كل اللي معك، ما راح تقدر تشتري الاكسسوارات الضرورية مثل الكيبورد والماوس والشاشة حتى! أو يمكن تكون موجودة عندك في الأساس فتقدر تدفع كل ميزانيتك على الجهاز.
بشكل عام تقدر تخلي ميزانيتك تبدأ من 3000 ريال إلى اللي تبغى تدفعه بدون حدود.
والمميز في الموضوع إن مواصفات الأجهزة بشكل عام صارت أقوى من السابق حتى لو كانت الميزانية منخفضة، فتقدر تلعب ألعاب كثيرة بدون ما تكسر رصيد حسابك البنكي.
ولا تنسى فيه ألعاب راح تشتريها، فاحسب ميزانيتك صح. ولأننا نهتم بكيف تبني بي سيّك سواءً كنت محترف ولا مبتدئ ولا بالوسط. خاصية جمّع جهازك في موقع لاعب تساعدك تختار جهازك قطعة بقطعة وفوقها يتركب وينشحن لك
ثانيًا: احتياجاتك + المواصفات
هنا الموضوع يصير أطول شوي
فيه أشياء كثيرة لازم تنتبه لها لما تختار جهازك، ومهم إنك تركز على نقطة انه يكون بي سي قيمنق ومو أي جهاز عادي
فإذا كنت راح تشتري بي سي عادي ممكن تلاحظ سعر أعلى ومواصفات عادية نوعًا ما.
وتركز بموضوع الاحتياجات لك، يعني وش يهمك بالألعاب دائمًا؟
الرسومات والجرافكس تبغاها تكون أعلى جودة؟ حاول تستثمر هنا بكرت شاشة ممتاز.
هل تبغى سرعة باللعب ولا يهمك الجرافكس كثير؟ ركز على المعالج.
طيب ممكن تكون شخص يلعب ألعاب كثيرة ومساحتها كبيرة؟ في هذه الحالة ركز يكون عندك هاردسك بحجم كبير.
وشغله ضرورية لازم تقررها، وش الشركة اللي تبغاها؟ إذا كنت تبي كرت شاشة AMD، حاول يكون المعالج من AMD كذلك عشان تحصل أفضل
أداء، وإذا كنت راح تختار NVIDIA، اختر معالج Intel لأنه التوافق بينهم أفضل.
ولا تنسى حاول يكون فيه هاردسك SSD في الجهاز، عشان يعطيك تشغيل أسرع للألعاب، وهل يكفيك SSD عادي أو M.2 واللي هو أفضل لكن راح يخلي سعر الجهاز أعلى.
اذا كنت تلعب لفترات طويلة، ممكن تحتاج تبريد معالج مائي، وممكن تكفيك مراوح التبريد في الجهاز.
كل هذي الأشياء حددها واعرف أولوياتك قبل ما تنتقل للنقطة التالية.
ثالثًا: مستوى الجهاز
النقطة هذي راح تحتاج تعرفها لأنها قد تكون النقطة الفاصلة قبل تشتري بي سي قيمنق
بعد ما حددت ميزانيتك لازم تعرف إنه في أكثر من فئة من لأجهزة البي سي قيمنق، فلو قلنا إنك راح تبدأ بداية بسيطة، فأنت راح تاخذ جهاز للمبتدئين أو ما يسمى Entry Level.
وإذا كانت ميزانيتك عالية نوعًا ما، فأنت تقدر تاخذ الفئة المتوسطة أو Mid Level وفيه مستويات أعلى.
هذا الشي تحدده من خلال طول فترات لعبك، ومستواك بشكل عام.
إذا كنت شخص راح تلعب ألعاب كثيرة وتطول على الجهاز فترات طويلة، فأفضل لك ترفع ميزانيتك وتدخل في الفئة المتوسطة.
وإذا كنت ناوي تروح لأبعد من اللعب مثل تسوي مونتاج أو تسوي بث مباشر، هنا ممكن تحتاج تطلع لمستوى الاحتراف أكثر وترفع ميزانيتك، عشان ما يخرب لعبك بأداء بطيئ لاستعمالك الثقيل للجهاز.
في الغالب إذا كنت شخص مبتدئ بالألعاب وجو ألعاب البي سي وما تعتبرها أولوية عندك، فالمنطقي إنك تشتري جهاز من الفئة المبتدئة Entry Level، الجهاز بمعالج i5 راح يوفي الغرض وزيادة، وكرت شاشة NVIDIA GTX1650.
يعتبر أداءه اقتصادي وممتاز ويوفق بين الأداء العالي والسعر الجيد، وراح يكفيك 16GB من الذاكرة العشوائية RAM ممكن تشوف هنا عدة خيارات للذاكرة العشوائية وأكيد إذا كنت تلعب بين فترة وفترة وتحب تجربتك في اللعب تكون سلسلة وممتعة، و هاردسك 1 تيرا يكفيك وزيادة.
لكن إذا كنت راح تخصص أوقات أكثر في اللعب وحاب يكون جهازك لك وللزمن، فراح تحتاج إلى إنك توصل إلى البي سي قيمنق المستوى المتوسط Mid Level، راح يعطيك أداء ممتاز، بمعالج i7 ما راح يخذلك بسرعته اللي توصل إلى 4.80GHz وكرت شاشة RTX 3070 فهو قفزة كبيرة من فئة Entry Level
وإضافة حلوة يكون عندك هاردسك 1 تيرا، بالإضافة إلى 1 تيرا SSD، بإجمالي 2 تيرا راح تكفيك تحمل فيها ألعاب كبيرة وتشغلها بدون مشاكل، وتقدر إلى حدٍ ما تسوي بث وأنت تلعب.
وطبعًا تقدر تبحث أكثر وتتصفح أجهزة بالمستويات الأعلى في حال كنت راح تسوي بثوث كثيرة فراح يكون استثمار أفضل لو رفعت في ميزانيتك.
في النهاية هذا جهازك وأنت أعرف باحتياجاتك
المميز في الأجهزة اللي عطيتك اياها كمثال، إنك في المستقبل تقدر تطور القطع فيها، سواء كان كرت شاشة أو تضيف رام أو هاردسك أو حتى تبدل المعالج
عشان كذا احرص إنك تختار البي سي قيمنق المناسب لميزانيتك وبشكل تدريجي تزود على القطع وتغيرها وتطورها
إلى ما توصل إلى مستوى الاحتراف ويكون معك أفضل جهاز في الدنيا.
اطلب جهازك وجمّعه بنفسك قطعة بقطعة: