شفناها مع العديد من اليوتيوبرز، والستريمرز، إسمها معروف في مجال سماعات القيمنق، جودتها محد يقدر يقلل منها، صنعت لنفسها مكانة في عالم القيمنق في وقت قصير رغم كثرة الشركات المنافسة والمعروفة، وأي لاعب راح يبحث عن سماعة قيمنق بسعر وجودة تناسبه، راح تكون وحدة من سماعات هايبر إكس واحدة من اختياراته.

 

سماعات هايبر-إكس، بدأت في عام 2014 كجزء من شركة Kingstone للتقنية، بإطلاقهم أول سماعة مخصصة للقيمنق تحت إسم HyperXCloud والمعروفة حاليا بإصدارها الجديد HyperX Cloud ll أو الجيل الثاني منها، ومن بعدها بدأت في إطلاق عدة أنواع مثل الستينجر والألفا والريفولفر وغيرهم من الأنواع، والبعض منهم له عدة فئات، لكن في هذه المقالة راح نذكر لكم الأبرز منها واللي يناسب احتياجك كلاعب.

 

 

سماعات HyperX Cloud Stinger: 

 

سماعات القيمنق من ستينجر منها عدّة موديلات، واللي يميّزها هو سعرها مقارنة باللي تقدمه من جودة في الصوت وجودة في المايك، حيثُ أن أسعارها تتراوح من 200 إلى 350 ريال، تزيد أو تنقص على حسب المميزات، واللي سعره منخفض راح يعطيك أداء عالي في الاستخدام حيث انه يتناسب مع ألعاب الجوال، وحتى الألعاب اللي ما تحتاج سماعات محيطية، وتحتاج جودة صوت ومايك مقبولة، تتميز بخفة وزنها وتصميمها البسيط المناسب للاعبين الصغار في السنّ والمبتدئين، بل حتى السعر المرتفع منها، راح يتوافق مع الألعاب عالية الجودة، وتوفر عدة ألوان على حسب نوع الجهاز المستخدم سواءَ كان بلايستيشن باللون الأزرق، أو الإكسبوكس باللون الأخضر، أو اللي يناسب البي سي باللون الأسود المطفي، والألوان هي فقط زينة لكن في النهاية كلها تشتغل على الجهاز اللي راح تنشبك فيه.

 

بعضها يحتوي على ازرار واحد فقط واللي هو يرفع ويخفض الصوت، والفئة ذات سعر 350 تجي بكرت صوت صغير تتحكم منه وهي الفئة العالية من ستينجر وتدعم تقنية صوت 7.1، وراح نحط لكم بآخر المقال روابط لفئات الستينجر تقدروا تستعرضوا فيها السماعات وتختاروا اللي يناسبكم منها.

 

سماعات Hyper X Cloud Alpha S:

 

النسخة المحدّثة من سماعات القيمنق السابقة Hyper X Cloud Alpha والموجهة للألعاب وبالذات البي سي، وتختلف بإصدارها القديم مو بس في اللون اللي كان أحمر وصار أزرق، بل حتى في ملمس الإطار للسماعة وبالإضافة إلى التغير الجوهري في الأنماط الثلاثة اللي تقدر تغيرها، وأيضًا قطعة الصوت اللي فيها 6 أزرار، تقدر تفعّل منها خاصية الصوت المحيطي وترفع صوت اللعبة وتخفضه حسب لعبك، ويجي معها زيادة اسفنجات قماشية في حال إنك تبي تبدل بين الجلد والقماش، وصوت المايك فيها مقبول بالمقارنة بسعرها.

 

سماعات Hyper X Cloud Revolver: 

 

سماعة القيمنق هذه تتميّز بشكلها الفريد عن أخواتها، لأنها بتجي باللون الأسود والأبيض وتصميم ما يشبه اللي ذكرناها قبل، وتُعتبر من الفئات العليا من سماعات هايبر-إكس، تتميّز بجودة الصوت الواضحة والمحيطية، والمايك واضح في التسجيل والكلام، تتوافق مع جميع الأجهزة، وجودة التصنيع فيها جعلت من حركة السماعة ومرونتها عالية جدًا، وبنظر الكثير من الاعبين إنها تستحق سعرها لوجود القليل من العيوب مقارنة بمميزاتها اللي تغطي عليها.

 

سماعات Hyper X Cloud ll: 

 

الغنيّة عن التعريف والمتواجدة عند غالب الاعبين المحترفين اللي يبحثوا عن أفضل أداء صوت، بأفضل مايك، بالإضافة لكونها المنتشرة بين اليوتيوبرز والستريمرز، سماعة القيمنق هايبر-إكس كلاود الإصدار الثاني، شكلها المميز باللون الأحمر والأسود هو ماجعلها تتربع على قمة القائمة في أدائها، الكثير من الاعبين يرشّحها لأن فيها كل المميزات اللي يحتاجها الاعب المحترف وبدون أي تردّد هي الأفضل في الإختيار، نافست هذه السماعة الكثير من سماعات القيمنق الاحترافية الموجودة حاليا مثل الآسترو والريزر وغيرهم، بل وبعض القيمرز يفضلها عنهم. تدعم خاصية التحكم بصوت اللعبة والشات، والمحيطية، ومدخل السلك فيها USB أو اذا ودك تخليه مدخل سلك 3.55 كلها راح تعطيك أداء مبهر.

 

في الختام، سماعات هايبر-إكس فيها فئات تناسب جميع أنواع الاعبين، بجميع أعمارهم، واللي جعلها منتشرة هو سعرها الممتاز مقارنة بجودتها، وتعتبر دائما أسرع خيار في حال كان الاعب يحتار وش يشتري سماعة على قد ميزانيته وتأدي الكفاءة اللي هو يحتاجها