OLED vs QLED ايش الفرق بين التقنيتين؟
تقنية OLED و QLED ممكن يكون الفرق بينهم الحرف الأول فقط لكن الفروقات بينهم كبيرة جداً و جوهرية ولكل تقنية مزايا وعيوب لازم تعرفها وتكون ملم فيها ويصيرعندك الخلفية الكاملة من المعلومات قبل ما تقدم على الشراء وتدفع مبلغ وقدره خصوصاً ان اسعار الشاشات غالية ومو رخيصة..
لكن في هذا المقال راح نتكلم ونفصل أكثر عن تقنية QLED و OLED وراح نعرف ايش الفرق بينهم ونستعرض الايجابيات والسلبيات لكل تقنية ومن بعد قراءتك لهذا المقال أوعدك إنك ما راح تكون محتار بينهم بعد اليوم وبتكون ضليع و خبير في تقنية شاشات ال QLED و OLED
اولاً لازم نرجع لنقطة البداية ونشوف الشاشة الاولى بتقنية LCD وكيف تطورت من بعدها وانطلقت كل التقنيات الحديثة الي صارت موجودة الان .
لو تكلمنا عن طريقة عمل LCD بطريقة تشريحية من الداخل راح تكون الشاشة مقسمة إلى عدة شرائح بخطوات معينة ومن خلالها تظهر لنا الصورة في صورتها النهائية ،،
الخطوة الاولى تبدأ من تشغيل التيار الكهربائي الى الشريحة الاولى المكونة من اضاءة خلفية على شكل لمبات أنابيب واللي تسمى ب CCFL ينتقل الضوء الى شريحة باللون الازرق بعدها تنتقل الى غاز فسفوري باللون الأصفر ومع اصطدام الالوان يظهر اللون الازرق وبعد ما ينتقل للشريحة الي بعدها يظهر اللون الابيض ومن بعدها الى اهم عنصر في شاشة LCD الي هو liquid crystal او الكريستال السائل الي بدوره يقدر يحدد القيم المطلوبة للاضاءة من اللون الابيض وبعدها ينقل الصورة الى البكسل المكون من ثلاثة ألوان رئيسية الي هم الازرق والاخضر والاحمر او المعروف ب led بعدها تنتقل الى فلتر وفي الأخير ومن بعد كل هذي المراحل تظهر الصورة النهائية على الشاشة الرئيسية ..
ولكن بسبب كثرة هذه الخطوات صارت الشاشة بحجم كبير بالإضافة لوزنها العالي ايضا الحرارة الي تنبعث منها عالية ، كل هذي السلبيات خلت المطورين يخرجون لنا بتقنية LED والي تعتبر بنفس فكرة LCD وبنفس خطواتها بتشريحها الداخلي ولكن الفرق الكبير الي صار هو ب استبدال لمبات أنابيب الإضاءة بإضاءة led تكون موزعة في خلف الشاشة بأكثر من طريقة .. ف بعض الشاشات تكون موجودة على حواف الشاشة وبعضها تكون في الوسط وبعضها تكون بشكل عامودي على كامل الشاشة .. وهذا الشيء ساعد بأن تكون الشاشة بحجم أصغر ووزن أخف وموفرة للطاقة أكثر مقارنة بشاشات LCD ..
اما شاشات ال OLED الي ظهرت في السنوات الاخيرة فتختلف طريقة عملها بشكل جذري ..
فالحرف الأول من oled يعني organic أي عضوي واللي هو مادة جديدة تمت إضافتها إلى الشاشة بحيث يكون كل بكسل أو مربع ألوان موجود في الشاشة عنده القدرة في التحكم في الإضاءة من نفسه ويقدر يشع بدون اي وسيط ..
فبدل ما تحتاج الشاشة لكل الخطوات الموجودة في led وlcd صارت الخطوات مختصرة بشكل كبير وفكرتها هي انها تكون لمبات الled عضوية بمعنى انها بتقدر تشتغل وتشع من نفسها مباشرة على البكسلات بدون الحاجة الى اضاءة خلفية وبسبب هالشي صارت الشاشة مكونة فقط من شريحة RGB و شريحة زجاجية وبعدها فلتر وتظهر الصورة على الشاشة الرئيسة ،، ايضاً صارت الشاشة نحيفة جداً في مظهرها الخارجي و ملاصقة للجدار بدون اي حيز من الخلف ..
فيه شركات تصنع هذي التقنية لكن تعتبر LG هي المصنع الأول في العالم وأيضا تقوم بصنعها لشركات كبيرة مثل سوني او فيليبس باناسونيك ولشركات كثيرة .. اما سامسونج كانت لها تجربة مع هذه التقنية لكنها توقفت بسبب ارتفاع تكلفة تصنيعها وبما أن سامسونج هي المنافس الأول والقوي لLG خرجت بتقنية QLED وفكرتها تكون بوجود فلتر Quantum يكون في الوسط ما بين شريحة led وبين البكسلات ومن خلالها تعطي مميزات على الصورة بشكل اكبر .. لكن لو تكلمنا اكثر عن فلتر Quantum او ما يسمى بالنقاط الكمية فالمقصود بنقاط الكمية هي مواد دقيقة للغاية تكون بحجم النانو من خلالها تنتج ألوان مختلفة من الضوء الملون تتغير بسرعة ودقة عالية مع تغير الصورة ومن خلالها تزيد كفاءة مستوى ضوء الانارة وتصير جودة الجمالية في الصورة المخرجة على الشاشة متقنه بشكل رهيب ..
ومن بعد ما عرفنا وش يعني OLED و QLED وكيف طريقة عملها نصل الآن إلى أهم شيء في هذه التقنيتين واللي هو الفروقات الجوهرية بين الشاشة وأيهما أفضل وإيش تتميز كل شاشة عن الأخرى وايش العيوب الموجودة في كل شاشة ..
QLED
- لو تكلمنا عن السعر ف بتكون أرخص من شاشات OLED بشكل واضح لأن مواد التصنيع في شاشات الـ OLED غالية ومرتفعه - بالنسبة لسطوع الشاشة فهو عالي جدا وافضل من OLED..
- أما الألوان فهي قريبة من الطبيعة بشكل خيالي بسبب وجود الفلتر الداخلي Quantum اللي من خلاله يحسن الألوان ويخرجها على الشاشة بطريقة مذهلة
- العمر الافتراضي لشاشات QLED عالي بسبب مواد التصنيع المستخدمة تعطيها استمرارية اكبر عكس شاشات ال OLED اللي راح نفصل فيها أكثر في ثنايا المقالة ..
من اكبر عيوب شاشة QLED هو اللون الأسود لأن التركيب التشريحي الداخلي سبب خلل بأن تكون الشاشة ليست باللون الأسود بشكل فعلي وصارت مايله للون الرمادي ..
- زوايا الرؤية باهتة بشكل كبير بمعنى إنك لو كنت واقف أمام الشاشة بشكل مستقيم راح تكون الرؤية ممتازة لكن لو تحركت إلى يمين او يسار الشاشة راح تلاحظ أن الألوان صارت مختلفة و باهتة عما كانت عليه وانت قدامها في المنتصف ..
- QLED موجهة اكثر للشاشات المنزلية وما تناسب القيمنق بشكل كبير ويرجع السبب لبطء الاستجابة فيها مقارنة بشاشات الـ OLED ..
على سبيل المثال لو كانت فيه شاشتين QLED و OLED جنب بعض وفيها لعبة معينه راح تلاحظ الأجسام المتحركة في QLED فيها تشويش وعدم وضوح بشكل بسيط عكس شاشة OLED اللي فيها سرعة استجابة ووضوح عالي
OLED
- زوايا الرؤية ساطعة وممتازة وما تعاني من أي خلل حتى لو وقفت على زوايا الشاشة من اليمين أو اليسار راح تكون الألوان نفسها وغير باهتة بدون أي اختلاف بعكس شاشات QLED
- اللون الأسود ممتاز ومعبى بشكل كامل وغير مايل للرمادي عكس QLED اللي تعاني من خلل في هذا الجانب..
- مناسبة للقيمنق بفضل سرعة الاستجابة في عملية نقل الصورة على الشاشة عكس شاشات QLED
- على الرغم من أن OLED صدرت قبل QLED إلا أنها إلى الآن لا زالت أغلى منها ويرجع السبب لارتفاع تكلفة مواد التصنيع فيها ..
- سطوع الشاشة منخفض مقارنة بشاشات QLED
- الألوان مشبعة بطريقة مبالغ فيها وبعيدة عن الواقع لكن البعض ممكن يشوف هالشي ميزة والبعض يشوف أنها من عيوب الشاشة ويرجع الأمر لك أنت كمستخدم..
- الصمامات العضوية organic الموجودة في OLED لها عمر زمني محدد و من المحتمل وبشكل كبير إنك تواجه فيها مشاكل او اعطال بعد فترة استخدام معينة وراح تبدأ البكسلات بالخمول ومن خلالها راح تقل جودة الصورة والإضاءة والوضوح و الألوان بشكل تدريجي وبتلاحظ أنها اختلفت بشكل كبير عن جودتها وهي جديدة بحيث أنها تتعرض البكسله الوحدة للتلف وتنحرق وتكون طافية وهذا الشيء ممكن تواجهه و ممكن لا حسب حظك
- من اكبر عيوب OLED حروق الشاشة او Born N والي هو لو تركت الشاشة مثلاً لفترة معينة ولمدة طويلة على صورة ثابته راح تلاحظ أن الصورة انطبعت وصارت خلفية شفافة .. ويرجع السبب لإشعاع البكسلات بطريقة مستمرة على نفس القيم الثابتة
في الأخير ومن بعد قرائتك للمقالة ومعرفتك لمزايا وعيوب كل شاشة وحبيت تقتني وحده فيهم سواء كانت OLED او QLED ف حاب اقولك ان لاعب توفر كل الشاشتين في متجرها وبافضل الاسعار اللي ممكن تلقاها .. وعشان نختصر عليك المشوار راح نستعرض معك هنا بعض الشاشات اللي ممكن تعجبك
وعشان نسهل عليك راح نستعرض أهم المنتجات الموجودة في المتجر من خلال القائمة التالية :
