مبيعات البلايستيشن 5 مقارنة بمبيعات البلايستيشن 4

ظهرت سوني بتقارير رهيبة في عرضها الأخير عن مستقبل الشركة، والوضع الحالي لمبيعاتها

وكلنا أكيد عارفين وشايفين سُرعة بيع وانتهاء أحد أهم أجهزتها وهو البلايستيشن 5، لأنه بمجرّد ما يظهر في السوق يخلّص! وصارت الناس تتابع حسابات تنشُر أماكن توفّره، وطبعًا سوني قدمت تبرير في تقريرها عبر إحصائيات تقارن فيها البلايستيشن 4 والبلايستيشن 5 *بعد سنة من إطلاقهم* والإحصائية كالتالي:

في أمريكا كان يبيع 80,000 جهاز بلايستيشن 4 خلال تسعة أيام

بينما البلايستيشن 5 يبيع 80,000 جهاز خلال 82 دقيقة!

 

بمعنى إن البلايستيشن 4 بعد سنة من إطلاقه صار يبيع 6 أجهزة في الدقيقة، أما البلايستيشن 5 فبعد سنة من إطلاقه يبيع 1000 جهاز في الدقيقة!

 

هذا غير الدراسة اللي سووها عن اهتمام اللاعبين بشراء هذه الأجهزة والنتيجة كانت إنه بعد سنة من إطلاق بلايستيشن 4 كانت نسبة اللي مهتمين يشترونه 28% 

 

بينما 55% من اللاعبين لسى مهتمين بشراء بلايستيشن فايف والسبب واضح! إن لسى في لاعبين كثير ما أمتلكوه، لذا السؤال : ليه البلايستيشن 5 بعد سنة من إصداره مازال الطلب عليه عالي؟ الجواب بسبب القصور في تصنيعه وتوزيعه حول العالم صار فيه لاعبين يتمنوا يشتروا الجهاز لكنه غير متوفّر.

 

ومن الطبيعي إن عدد المبيعات المهول اللي ذكرناه لكم فوق ما يعكس فكرة إن مبيعات البلايستيشن 5 تفوّقت على مبيعات بلايستيشن فور بـ 10,000% ، لأننا لو سوينا مقارنة بين عدد الأجهزة المباعة خلال السنة بين الجهازين راح تلاحظ إنه بعد سنة من إطلاق الجهازين، البلايستيشن 4 باع 53,4 مليون جهاز  والبلايستيشن 5 باع 17,8 مليون جهاز.

حتى إن شركة سوني واجهت ظاهرة في إنتاج وعدد مبيعات البلايستيشن 5 وسمّتها "الظاهرة الغير مسبوقة" وفعلًا بناءً على الأرقام الحالية هي ظاهرة!

 

وطبيعي إننا كلاعبين نتخيّل إن لو سوني كانت قادرة على إنتاج أجهزة بلايستيشن فايف اللي تغطي احتياج الاعبين كانت مبيعاته كسّرت الدنيا وحقق أرقام قياسية على عكس باقي الأجهزة، لكن الشيء المؤسف إن وضع البلايستيشن 5 الحالي راح يستمر إلى 2023 بسبب مشاكل في شحن الأجهزة للدول وإحضار القطع الازمة في التصنيع، والسوق ما راح يرجع لوضعه الطبيعي الأكيد إلا في 2024 وهذا على حسب كلام الشركة.

ومع نقص الإمداد في البلايستيشن 5 صار فيه تطوّر جديد في الشركة، سوني بدأت تستوعب إنها قاعدة تخسر نفسها وممكن تدخل في مشاكل مالية لو ضيقت الحصريات على أجهزتها فقط في الفترة اللي ماهي قادرة تصنّع فيه أجهزة زيادة، ولهذا السبب قررت طرح ألعاب أكثر على البي سي وحصلت على إقبال كبير بدايةً بلعبة God Of War المعروفة، وحتى بعض الحصريات الأخرى راح تنزل تدريجيًا مثل لعبة Returnal واللي راح تنزل قريب على البي سي بنسخة مطوّرة.

 

مقارنة بمايكروسوفت اللي أنشأت اللعب التشاركي مابين البي سي والإكسبوكس من فترة، سوني قاعدة تشارك مع البي سي لكن بطريقة مختلفة، وهي إن مبيعات حصريات بلايستيشن راح تكون منفصلة في البي سي وهذا بسبب الطلب العالي من اللاعبين على حصرياتهم واللي راح ينعكس بشكل إيجابي على استقرار وازدهار شركة بلايستيشن.

 

مُتوقع إن جهاز البي سي راح تزداد مبيعاته، لأنه شركة سوني تقول إنه من ضمن خطتها "نصف مبيعات الألعاب راح تكون من البي سي والجوّال بحلول سنة 2025".